BJP lenir kati Karnataka CM kolak tangzüktsü amokmeren

Shivamogga (Karnataka), Nov. 03 (Agencies): Mangatettep ken o tulu adoktsüsa local BJP lenir kati, Karnataka Chief Minister, Siddaramaiah-i Shivamogga nung yimjak nung nashi shi chira iba anogo nungjisa pa kolak tangzüktsü, ta yashi amokmerena jembiba sülen tanü police pa puogo.

Taoba hopta Chief minister Siddaramaiah-i nashi shi onük nung jembiba o anema local BJP-i lungkak aitba mapang Shivamogga City Municipal Council nung taoba Tir, S N Channabasappa-i, “Nai yimjak nung nashi shi achitsü ta shiteter ma (?) Na teburchi süra yagi (Shivamogga) arur Gopi Circle nung nashi shi chiang, iba sülen kasa anogo nung kecha tarentak makai nü kolak tangzüktsü,” ta ashi.

“Hindu nunger melungsentsü den nai asayar asü (?) Yamaji teinyak,” ta Channabasappa-isa ashi.

Iba o ashishia tanü Bengaluru nung osangbenertem den jembidang CM Siddaramaiah-i, “Iba ya rara adokdaktsütsü o lir. Iba ya bushisüngdangtsü atema ni police dang tuyutsü. Ibaji shitak süra temerenshi agütsütsü,” ta ashi.

“Ni achitsü ta jembira, ibaji ajanga komaser nütsüng timba aliba tamangba lokti melung yirutsütsü (?) Asenoki tanga shi balala machir masü ama (?)” ta paisa ashi.

“Chiyungba yimya ya nija ka melung, iba nungji shingaia mejangjongtsüla. Jangjongba aser tangar temeten aitsübaji tim masü. Ibaji Temzüng alema lir,” ta paisa ashi.

Iba dak sentakba nung Shivamogga SP, Ravi Channannavar-i, Chief minister taküm agitsü amokmerenba atema Channabasappa anema FIR ka benokogo, ta ashi.

Taoba hopta Karnataka Youth Congress General senden nung Siddaramaiah-i, “Tanü tashi nung ni nashi shi kodanga mechidang. Ajisüaka ni nashi shi chinüra achitsü. Nisung shingaia ni menokdangtettsü,” ta jembia liasü.