BJP lenir Ojha tepsetba ken o nung nisung 5 puogo

Patna (Bihar), February 13 (Agencies): Bihar BJP tatong Tir, Visheshwar Ojha tepsetba sülen anogo ka lir tanü Honibarnü Bhojpur police-i nisung ka puogo aser iba ken o nung asüngdangatsü atema nisung pongu sota lir.
“Visheshwar Ojha tepsetba ken o nung police-i Harendra Singh (Bhua Singh) puogo,” ta state police headquarters nungi sangdong ka ajanga ashi.
Ojha tepsetba ken o nung FIR benoka aliba nung Harendra Singh densema tai tonglokja alir nisung tenet tenüng agüja lir.
Taoba assembly elections nung Ojha-i BJP ticket amer Shahpur menden nung toktepa liasü ajisüaka tamakok angu.
Hokolbar aonung Bhojpur, Shahpur police station kübok Sonbarsa anasa nisung kari Ojha kaseta liasü.
Shahabad range DIG-i, Harendra Singh puogo aser iba ken o nung asüngdangyatsü atema nisung pongu sota lir, ta ashi.
DIG-isa, nisung pongu dang asüngdangyaba nung ajemdaker nisung tepsertem aputsü atema police telok ka Uttar Pradesh, Balia district-i yokogo, ta ashi.
Hokolbarnü BJP Bihar unit-i Ojha tepsettertem aputsü atema Nitish Kumar’er sorkari nem ghonda 72 latetja liasü, iba mapang tashi nung aibenertemji pua marutetra ano lungkak tesashiba aittsü ta party-isa amokmerena lir.
Party-isa Deobar nü Shahabad mokdangtsü ayonga lir. Shahabad region nung district pezü- Bhojpur, Rohtas, Kaimur aser Buxar lir.