BJP lenirtem kima nashi sendaka yujang: Lalu

Patna, May 06 (Agencies): RJD tongti, Lalu Prasad Yadav-i, RSS aser BJP lenirtem kima nashi sendaka yutsütsüla, ta jembiba sülen nisung kari ibaji süoki ia agia atangji BJP lenir ka kima nashi sendaka yutsüba atema Lalu den nisung pongu anema ken o ka benokogo.
Rajgir, Nalanda district nung party nung inyakertem den jembidang Lalu Prasad-i, RSS aser BJP lenirtemi `gaumata` (nashi tetsü) memeimer. BJP lenirtemi nashi kümzüka ayutsü indang jembir saka parnoki nashi teküp agi yangluba tsüngsem asemer, ta aija liasü.
Paisa party nung inyakertem dang, peipei tesem nung mamatzü magütsüba nashi teintet rogotem RSS aser BJP lenirtem kima alena yujang, ta jembia liasü.
Ajioda party nung inyaker kari iba oji süoki ia agia Bihar, Vaishali district nung parnoki Hajipur nung alir BJP lenir, Chandeshwar Bharti’er kima nashi kar sendaka yuja liasü.