BJP lenirtemi Home Minister ajuru

Kohima, May 23 (TYO): May 22, 2019 nü Nagaland Deputy Chief Minister, Y. Patton aser Higher & Technical Education Minister aser BJP Nagaland unit Tir, Temjen Imna Along na leniba nung BJP MLA tem- Jacob Zhimomi, Kashiho Sangtam, Dr. Longrineken, Mhonlumo Kikon, Tovihoto Ayemi, Kasheto Kinimi, Khehovi Yepthomi aser H. Haying nungeri New Delhi nung Union Home Minister, Rajnath Singh par kidang ajuruogo, ta Brihostibarnü Media cell. Dy CMO sangdong ajanga metetdaktsü.
Exit polls ajanga Ato kilonser, Narendra Modi aser National BJP Tir, Amit Shah na leniba nung BJP-i aniba NDA-i takok ngua ano sorkar akümtsü, ta meteta Nagaland nungi BJP lenirtemi National BJP lenirtem nem tenüngsang agütsüba den külemi grassroot level nung BJP nung inyakertemi tawa agiba Lok Sabha election nung kanga meranga inyakba atema tenüngsang agütsüogo.
Parnokisa Rajnath dang, Nagaland nung Chief Minister, Neiphiu Rio leniba kübok NDA sorkari nüburtem tajungtiba agi tenzüktsü, ta shia Union Home Minister dang taruba sorkar kümsük nunga akok tashi lenmang ajak nung Nagaland sorkar yariang ta mepishi, ta sangdong nung shia lir.
BJP lenirtemisa Union Home Minister dang Delhi police-i Lucknow nung Vijay Farmana aser pa den yaritepertem apuba sülen bushisüngdangba ajanga Nagaland nung aliba yimtenren lenir ka tepsettsü asalentong aliba ken oji kanga junga bushisüngdangdaktsüner, ta mepishi. Yamaji Home Minister-ia iba ken oji junga bushisüngdangtsü aser asalentong ajak kaktettsü atema inyaktsü, ta shiogo.
Asüng tashi nung Nagaland Minister- Pangnyu Phom aser Paiwang Konyak nata Delhi nung Nagaland BJP lenirtem den adentsü.
Tesülen BJP lenirtemi National GS, Ramlal Ji aser Ram Mahdav ji, North-East General Secretary na ajurua party aser nüburtem dak sendakba onüktem nung o lemtepa liasü, ta kasa sangdong ajanga metetdaktsü.