New Delhi, October 18 (Agencies): Dadri nung nashi shi achi ta olulu jembiba nung ajemdaker Muslim nunger ka tepsetba onük nung BJP lenirtemi o kanga mekümdangi jembiba ajanga Ato kilonser Narendra Modi kanga jashidar, aser iba yongji tanü BJP National Tir, Amit Shah-i o mekümdangi jembirtem merenshia tekümdangtsü o shiogo, ta NDTV dang osang ka ajanga ashi.
BJP tongti Amit-i merenshirtem rongnung Haryana Chief Minister Manohar Lal Khattar, Union Minister Mahesh Sharma, party MLA Sangeet Som aser mapang shia mangatettep adoktsüsa o mekümdangi jembir BJP lenir ana- Sakshi Maharaj aser Sanjay Baliyan nunger liasü.
Item lenirtemi o kanga mekümdangi jembiba ajanga nashi shi onük nung mangatettep tamajungba küma linük nung nüngtugu kaketzülur 42-i lungkak aita Sahitya Akademi Awards meyipa agütsüogo.
Yashi BJP den tongtibang teloktep party- Shiromani Akali Dal-ia BJP dang, Dadri tatalokba nung o mekümdangi jembirtem nem temerenshi tulu agütsütsüla, ta takhangba agüja liasü.
Dadri nung Muslim nunger Mohammed Iqlakh tepsetba sülen linük nung nüburtem tejashi nung aliba mapang ka nung BJP lenir aser Union Minister Sharma-i loktii nisung tepsetbaji lendong ka atalokba dang ta jembia liasü, BJP MLA Som-i Dadri semdangba sülen nashi tepsetertemji Akhilesh Yadav-i aniba sorkari kümzük ta jembi, BJP lenir aser Haryana CM Khattar-i, Muslim nungeri India nung maneni linüra nashi shi machitsüla ta jembi aser Sakshi Maharaj-i nashi tepsetertem nem tasüba temerenshi agütsütsüla, ta jembia liasü.
You must be logged in to post a comment Login