BJP lennirtem sadoka mesenzütettsü: AASU

Guwahati, January 24 (Agencies): Assam aser Northeast kübok tanga state tem nung Citizenship Bill anema lungkak aitba tuluba küma arudar aser lungkak aitertemi BJP dang iba mapa tuluba inyaka aotsü ta kümdangtsü metetdaktsüogo.
Mizoram nung NGO aser telok tongtipangtemi Republic Day nung medeni mokdangtsü ta metetdaktsü.
“Parnoki Citizenship Amendment Bill agizüktsü atema mapa inyakra BJP lennirtemi sadoksadoka mesenzütettsü” ta All Assam Students Union (AASU) nung General Secretary Lurin Jyoti Gogoi-i ashi.
Brihostibarnü North East Students Organisation (NESO)-i Guwahati nung aliba Latasil Field nung lokti senden ka ayonga agidang nisung meyirjang aika gamusas (traditional towels) agir aser tezülubatem amer aden.
“Onoki shinga metoktsütsü. Iba ya onok maitsü atema lir” ta AASU atema chief adviser Samujjal Bhattacharya-i ashi.
Ajisüaka, North Cachar Hills Autonomous Council nung BJP-i takok tulu nguogo. Tawa tu parnokisa panchayat elections nung takok angu aser Karbi Anglong nung civic polls nunga takok nguteta liasü.
BJP lennirtemi ashiba agi iba bill dak sendakba nung osang tiyazü prokshir aser Amendment nungji December 2014 anogo lateta lir.
“Assam-i Hindu Bangladeshi nunger crore 1.9 shi senoka aittsü ta osang belenshiba ajanga lungkak aiter. Ajisüaka, yamaji mataloktsü ta onoki ashir” ta BJP atema otongdar Rupam Goswami-i ashi.
AASU atema chief adviser Bhattacharya-i ashiba agi, “Ib Bill ya Assam Accord alema lir ta asübaji tiyazü masü.”
1979 küm Assam nung bendangertem anema mapa inyaktsü tenzükba nung AASU-i tongti shilem agi aser iba ajanga 1985 nung Assam Accord latet. Iba lungkak aitba mapang nisung 855-i taküm bendanga agütsü.
“Parnoki Bill meyipa magi tashi iba mapa metembangtsü” ta tanü sentong nung adener Madhab Baisya-i ashi. 1979 küm bendangertem anema lungkak aittsü tenzükdang paia shilem agia liasü.
“Parnoki Bill magien tashi lungkak aitba mapa tuluba inyaka aotsü” ta All Bodo Students Union President Promod Boro-ia ashi.
Lok Sabha nung Citizenship Amendment Bill agizükba sülen Assam nung tensa mejungi akümtsüsa lir, ta Director General of Assam Police Pallab Bhattacharyya-i Hombarnü ashi. Pai intelligence wing ketdangsür.
“Iba ama tensa ka nung ULFA(Independent)-i Hindi oshi jembirtem, Bengali Hindu nunger aser BJP züngsemtem dak teka aitsü akok” ta Pallab Bhattacharyya-isa ashi.
Mizoram nung Chief Minister Zoramthanga-i ashiba agi, par sorkari Coordination Committee of the NGOs den olemtepdar.
Coordination Committee of the NGOs-i Citizenship Bill anema Republic Day mokdangtsü osang metetdaktsüba sülen Mizoram state sorkari parnok den jembishinür.
“Republic Day asü nung onoki sentongtem aginür. Ozü home minister-i NGO lennirtem den angatetteptsü atema jembidar” ta Zoramthanga-i ashi. Paia Citizenship Bill magizüker ta metetdaktsüogo.