BJP mali nungang India-Pak yimjung ken o jembitettsü: Pak

Islamabad, October 03 (Agencies): India nung BJP tashi nungi atsüngien nungang India-Pakistan yimjung ken o jembitettsü, ta Honibar nü Pakistan osangkaket ka ajanga sangdongogo.

Pakistan-i osangkaket ka yimobilem ajanga, Islamabad-i merangdangyonga, telemtetba tajung ka atema New Delhi renema mali, ta ashi.

“Kobi melii BJP (Bharatiya Janata Party) tashi aliba nungi atsüngtsü imlar, iba sülenang sorkar tajungba ka den ano ken o jembitettsü imlar,” ta kasa osang ajanga ashi.

UN nung Pakistan representative, Maliha Lodhi-i UN nem Pakistan nung India-i kiralongraba kulikaket asem Pakistan-i agütsüba sülen kobi melii osangkaket ka nung iba osang prokogo.

Pakistan Ato Kilonser Nawaz Sharif atema National security aser Foreign Affairs Advisor, Sartaz Aziz-ia, Jammu & Kashmir LoC nung India-i tanen makai 2003 ceasefire tezüngzüktep alema inyaker, ta aitsüogo.

“Item kuli kakettem ajanga sayuyonga India sorkaribo Pakistan-i kiralongraba yarir ta maneni tai tongloktsütsü,” ta kasa osangkaket ajanga ashi.

“Item file nung aliba audio aser video ajanga India-i kiralongraba yarir ta kuli sayuyonga, iba jagi kecha balaka masütsü,” ta ashi.

“Tangbo India ya International jenjang tajung nung lir, aser Modi ya nüngtugu lir. (saka) Iba mapang ya süiatoktsü,” ta Pakistan-isa ashi.