BJP merenba mapang

Tsüngküm mongpu aser putu melenshiba ama alima yimten yimsüsüba menden melenshir. Yimtsüng sasep nunga putu melenshiba shia kidong kar khen, kar khen ta melenshia merener. Nagaland nunga mapang ka nungbo Congress Party merenmerena liasü aser tang NPF merener. Iba den kasa India linük nunga yimtenren party tulutiba ana- Congress aser BJP na melentepa merener, aser tang ya BJP merenba mapang aser Congress sentsü ajema akümba mapang ka asütsü. British yimsüsüba kübok India nunger küm aika lir nüjiso anguba sülen Congress-i küm aika linük yimsü süa aruogo, aser tang BJP-i aniba sorkari yimsü tesüdak lir. Yimtenren nung takotet lenirtemi par telok tashi itdaktsüba dang masü saka yimtenren nung tanemer party jenjanga raksatsüyonga aoer. Aji oda tang BJP-i Congress-i yimsüsüba state tem anokshitsüba ya asütsü. Tesüiba ita ishika tsüngda Arunachal Pradesh nung Congress sorkar aser Manipur nung Congress sorkar anokshitsüogo aser tang tesüsa Uttarakhand nung Congress sorkar anokshija March 27 nü iba state nung Tir yimsüsüba benokogo. Iba dak sentakba nung Congress lenir aser Himachal Pradesh Chief minister, Virbhadra Singh-i Congress Tir, Sonia Gandhi ajurua state yimtenren tebilemtsü süoka o lemtepogo. Pei dak mapet rongsen aliba ken o nung Enforcement Directorate (ED)-i Singh anema tang bushisüngdang tesüdak lir aser iba indang tebilemtsü onük-a pai Sonia den lemsatepogo. Assembly election agitsü aliba state, Kerala nung yakünü election nüboyimba sentong ka nung jembidang BJP Tir, Amit Shah-i, “Ozü party tongtibangtiba onükji ‘India nung Congress meshimeshi samatsütsü’ lir” ta odiodia jembiogo. Ano külen Nehru-Gandhi kibong merenba putu süiogo ta aikati bilemer. India nunger mezüng Ato kilonser, Jawaharlal Nehru nungi tenzüka par jala aser taoba Ato kilonser Indira Gandhi, lar jabaso aser taoba mapang Ato kilonser, Rajiv Gandhi, pa kinungtsü aser Congress Tir, Sonia Gandhi nunger mapang talangka  merenmerena liogo ajisüaka Rajiv’er jabaso Rahul Gandhi-ibo yimsüsüba senmang majangzükteter ta züngshir. 2014 küm Lok Sabha election nung Congress-i tamakok kanga mejungi anguba sülen nungi tenzüka party jenjang shia maruteter. Yimtenren party ajaki mapatong tajung benoker aser nüburtem dang jenti nangzüker, ajisüaka itemji mapa küma inyaker asü masü, ibaji tongtibang. 2014 General election nung nüburtemi Ato kilonser candidate, Narendra Modi dak tamang ka pai aniba party nem takok tulu ngudaktsüogo, aji oda par sorkari küm pongu yimüsüdang junga inyakra taoba mapangtem nung Congress sorkari atongatonga yimsüsüba ama nüburtemi parnoksa shimtsü, ajisüaka jembiba balaka aser mapa balaka ta süra ibaji ajanga Congress aser tanga party tem jenjang dang jungdaktsütsü. Taoba Lok Sabha election nung BJP-i takok tulu nguaka iba sülen Delhi aser Bihar assembly election nungbo parnoki tamakok mejungi nguogo. BJP-i Tamil Nadu, Kerala, Puducherry (UT), Assam aser West Bengal state tem assembly election nunga tamakok ngura parnoki party tashimaitba meyipa reprangshitsüsa akümtsü. Yimten yimsüsürtem menden melentsü aser süia aotsü, ajisüaka yimsüsüba menden nung alidang nübortem meima mapa tajung jenti inyaka toktsübaji nüburtemi kodanga mamatoktsü ajisüaka pei ajung dang asaa inyakra ibaji alimai sensamasatsütsü.