BJP Mizoram unit-i CM Thanhawla aitsür

Aizawl, June 20 (Agencies): BJP-i northeast tesem nung tashi angutsü merangba maparen nung par state dendaktsütsü tepungmang, ta Mizoram Chief minister Lal Thanhawla-i ashiba olen ka BJP Mizoram unit-i Hombarnü aitsüogo.
Khristan tem timba ser aliba state nung BJP tashitaitba akümer ta state PCC Tir, Thanhawla-i metettsüla, ta BJP state unit-i sangdong ka nung metetdaktsü.
Congress-i küm aika north-east nung yimsü süogo saka parnoki chichiba terenlok kecha bener maru. Nübortemi terenlok aginüba agi BJP ainer, ta sangdong nungsa shia lir.
BJP-i north-east region nung mapa tulu ka tenzüktsü sentong lir aser iba atema Guwahati nung luden ka tentetogo, ta taoba Hokolbarnü Mizoram Chief Minister-i shia liasü.
“Ajisüaka, parnoki iba sentongji Mizoram nung tenzüktsüba osang memetetdaktsü, kechiyong Mizoram ji Khristan tem timba ser aliba state ka lir ta parnoki meteta lir” ta Thanhawla-isa ashi.
BJP-i Khristan timba ser aliba Meghalaya state nung mapa inyaktsü tenzükogo aser ano Arunachal Pradesh nunga mapa inyaker. Parnokisa Manipur state nunga mapa zübazüba inyaktettsü ta bilemer. Ano yimten tsütsü tesentaktep meraksara BJP-i Nagaland nunga mapa inyaktsü maongka lir, ta Mizoram chief minister-i metetdaktsü.