BJP Mkg district team tasen shim

Mokokchung, December 09 (TYO): Hombarnü BJP, Mokokchung District office nung BJP Mokokchung District President tasenba, Imolemba Jamir den office ketdangpur team tasenpur sangdongba sentong agiogo; iba sentong nung district kübok frontals aser mandals nungi lenirtem aden, ta Media & IT Cell, BJP Mokokchung District sangdong ka nung metetdaktsü.
Mokokchung District President tasenba, Imolemba Jamir leniba nung pa kübok vice presidents asemji Nukshi I. Ozukum, T Nukshi Jamir aser Watitemsu nunger lir. Ano General secretaries anaji S. Moa Imsong aser Lanuyanger M. Longkumer na lir.
BJP constitution nung agüja aliba tashi nung ajemdaker district BJP office nung secretaries pezü- Alepla chang, T. Anungla, Lanuyanger Longkumer aser I. Lanutoshi Longkumer nunger shimogo.
Mokokchung BJP Treasurer ji lenir tain, Imtiwati asütsü.
Imolemba Jamir-i par team züngsemtem nem appointment letters agütsüdang pai BJP kübok nüburtem tenzüktsü jangraba lemsatep. Paisa BJP nükjidong aser mapatongtem temaba jenjangi ajungkettsütsü aser Naga nungera linük den tsüngkang medema renloktsü atema akokba tashi tajungtiba inyaktsü, ta metetdaktsü.
Mokokchung BJP unit atema tejangraba metetdaktsüdang Imolemba-i, party-i Aor lokti tentet balala den amaliteptsü aser district nung Aor tejangraba ataloktsütsü atema longjemer inyaktsü, ta ashi.
Imolemba Jamir-isa, BJP ya yimtenren party ka lir aser secular lir, iba denji külemi linük azükaru aser terenlok atema inyakba party lir, ta ashi.
BJP-i tamangba yimsü ajak akhümtsübur, ta shia Imolemba Jamir-i, BJP President indang office nung Laishiba ka ayutsü, koba ajanga party nung inyakertem aser lenirtem lenitsü, iba denji külemi district nung BJP manifesto ajungkettsütsü, ta metetdaktsü.
Paisa Chief Minister Neiphiu Rio aser Nagaland BJP president Temjen Imna Along Longkumer na leniba nung PDA sorkari tashi tait sorkar ka agütsüba aser state nung lenla ajaklen terenlok agütsüba atema tenüngsang agütsü.
Sentong tetenzükeln BJP 27 Mokokchung Town Mandal President, Tiakumzuk Tzudir-i BJP Mokokchung district president nungi anener, RN Nungsang-i grass root jenjang nungi party anitetba atema pelaba metetdaktsü.
Paisa President tasenba, Imolemba nem tenüngsang agütsüba den külemi pa leniba kübok BJP Mokokchung district-i temaba jenjang atongtsü aser nübur taginüba ataloktsütsü imlar, ta ashi.
Vice president T. Nukshi Jamir aser Rongsenyanger natia o tatsütsü jembi. Iba sentong ya President Jakjemmenla leniba nung agia liasü.