BJP MLA-i ozüng alema arua alir Bangladesh nungertem aitsü

Metsüremi 27, 2018 (Agencies): Assam, Nagaon district kübok Batadrava tesem nung tetsür chanu ka tashiyim agi raksatsür taküm arongba ken o ajanga state ajunga anokshitsüogo aser aikati iba ken o nung aibelena alirtem nem tasüba agi merenshitsü asoshi akhanger. Iba ken o nung aija alirtem rongnung tongtiba Zakir Hussain ya police temi puogo.
Nagaon district police superintendent Shankar Raimedhi-i ashiba agi, “tetsürchanula yagi la tasü yipden nung la dak tashiyim benshirtem asemprongla tenüng shia liasü. Parnok nem okadak ajanga temerenshi tulutiba agütsütsüdaktsütsü asoshi police temi takok tashi inyakdar.”
Iba ken o ajanga state assembly dena anokshija Congress puri assembly toktsür ao. Finance Minister Himanta Biswa Sarma-i, Parliamentary Affairs Minister Chandra Mohan Patowary dak aija alirtem tenüng metetdaktsütsü asoshi asüngdangba sülen Patowary-i Batadrawa, Mourajhar, Jagiroad, Tamulpur aser Juria ken o nung aija alirtem tenüng metetdakja liasü. Aija alirtem ajak ya state nung nütsüng ajema aliba lokti nungi lir. Iba dak sendakba nung aija alirtem ya state nung nütsüng ajema aliba lokti nungi ta tuteta ashiba ajanga AIUDF pur mepelai liasü.
Assam nung tawa kasa lokti nungi züngsemtemi tetsürtem dak tashiyim benshiba ajangshiogo. Tawa Lakhimpur nung tetsür ka dak Nurul Haque-i tashiyim benshitsü merang saka la jena otet. Tanga tatalokba ka nung tetsür ka tebuba jakdang tashiyim agi raksatsü. Iba ken o nung aija alir Nazrul Islam, Sultan Ali, Momtaz Ali, Ikramul Haque, Farzul Haque, Majidul Ahmad, Habibur Rahman aser Nazirul Haque nunger ajak Nagaon Police-i ghonda 24 tsüngda nung apu. Assam-Mizoram arrtsü len Hailkandi district nung arishi küm 14 tain tribal tetsürchanu ka Metsüremi (March) 14 nü tashiyim agi raksatsür tepseta doktsü. Iba ken o nung Jashimuddin Borbhuiya aitsüogo.
Hojai BJP MLA Shiladitya Dev aser Khumtai MLA Mrinal Saikia nati tetsürtem dak tashiyim benshirtem rongnung timba ka Bangladesh nungi ozüng alema arua alirtem lir, ta ashi. Tenati Bangladeshi nungi ozüng alema arua alir shirnok tetsürtem tashiyim agi raksatsüba aser tepesetba ken o nung densema lir, parnok anema jenjang tapet ka agitsüba atema khangogo. Shiladitya Dev-i ashiba agi, state nung tetsürtem dak tashiyim benshiba ya shilem 80 bo Bangladeshi nungi Muslim nunertemi inyaker ta pai taoba mapang ashibaji tai lir kechiyong iba ya shilem 95 shi lir.