BJP MLA Kuldeep anema nisung tepsetba ken o benok

New Delhi, July 29 (Agencies): Unnao (Uttar Pradesh) nung tetsür ka tashiyim amshia raksatsüba ken o nung tai tonglokja alisang, BJP MLA, Kuldeep Sengar anema nisung tepsetba ken o ka benokogo.
Amongnü nikongdang tetsürla mena aliba gari dak truck kati tsükoktsüba lendong nung lar kinünger tetsür ana asü aser la den lar lawyer kanga mejungi yirua liasü. Yashi iba tatalokba sülen tanü MLA den nisung teku anema nisung tepsetba ken o benok.
FIR nungji Sengar aser par adianu, Manoj Singh Sengar den nisung ti tenüng lir.
Tanü police ketdangser kati, “Indian Penal Code kübok Arrla 302 (nisung tepsetba), 307 (tepsettsü merangba), 506 (ozüng alema amokmerenba), 120b (ozüng alema asalentong yangluba) nung ajemdaker BJP MLA densema nisung ter anema FIR benok,” ta metetdaktsü.
Yashi iba lendong ya Rae Bareli nung atalok aser tetsürlar kinünger kati parnok anema ken o benokogo. Kasa lendong nungsa tetsürla tetsüa mejungi yiru aser lai ashiba agi, iba ya lar kibong rangben samatsütsü merangba lir.
Tetsüisa, “Iba ken o nung tai tonglokja alir ka jabaso, Shahi Singh den yimdak lanur kati onok amokmerena liasü. Parnoki onok anema inyaktsü ta shir liasü,” ta metetdaktsü.
Tetsürla indang lawyer ji tekolak kanga mejungi yirur KGMU Trauma Centre, Lucknow nung yaridar.
Iba tatalokba dak sendakba nung Congress lenir, Rahul Gandhi twitter ajanga, “Beti Bachao-Beti Padhao. India tsürtem atema shisaliok osang tasen ka. BJP MLA kari na tashiyim amshia raksatsüra nai ola madoktsüla,” ta ashi.
West Bengal Chief Minister Mamata Banerjee-ia Ato kilonser, Narendra Modi dang iba tatalokba bushisüngdangtsü atema high-level inquiry committee ka tentettsüla, ta takhangba agütsü.
2017 küm la mapa bushiba mapang nung Sengar-i la dak tashiyim mapa inyak, ta tai tongloktsüba sülen yaküm April 13 nü Sengar pua liasü.