BJP MLA Kuldeep Sengar anema ken o benok; CBI-i bushisüngdangtsü

Lucknow, Rongchii (April) 12 (Agencies): Uttar Pradesh kübok Unnao nung arishi küm 18 tain tetsür ka dak tashiyim agi shi nung medemba aser la tebu tepuokdak asüba ken o tem Uttar Pradesh sorkari CBI nem bushisüngdangtsü atema agütsüogo.
UP sorkarisa BJP MLA Kuldeep Singh Sengar anema ken o benoka aliba nungi pilaogo.
Yangtepnü (Brihostibar) anepdang Makhi Police Station nung MLA Kuldeep anema Indian Penal Code aser POCSO kübok ken o benok.
BJP MLA Kuldeep-i police tsüngdangi ao saka parnok ket nung magütsütsü ta ashiba sülen ghonda ishika ka lir Rasemnü (Bodbar) ayaterm nung iba ken o CBI nem agütsütsü atema telemtetba agi.
“MLA Kuldeep Singh Sengar aser tangartemi tashiyim agi shi nung medem ta tai tonglokja aliba atema FIR ka benokogo aser iba ken o bushisüngdangtsü atema CBI nem agütsüogo” ta Principal Secretary (Information)-i ashi.
“Tetsürla tebu tepuokdak lia asüba indang tatalokbatemjia CBI-i bushisüngdangtsü” ta paisa shisem.
Additional Director General of Police (Lucknow zone) lenisüba kübok Special Investigation Team ka tentetba sülen CBI nem bushisüngdang südaktsütsü indang telemtetbaji agi.
Allahabad High Court-i Adityanath’er sorkar dang iba tatalokba atema tebilemba asüngdangba sülen ghonda ishika lir CBI nem bushisüngdang südaktsütsü indang osangji metetdaktsü. Senior lawyer Gopal Swaroop Chaturvedi-i iba tatalokba indang osang züluba den asüng okadak angadangtsü ta sorkar dang shidi ka nung metetdaktsü.
Ballia district nung BJP MLA Surendra Singh-i Sengar pusema jembidang ashishitep aketba onük ka jembisem. “Shibai tanur asem tetsü ka den tashiyim agi shi nung medemtsü? Pa tiyazü nung tai tongloktsür” ta Surendra-i ashi.
MLA Kuldeep kinungtsü Sangeeta Sengar-ia la kinungbo aser arishi küm 18 tain tetsürla dak narco tests asütsü atema takhangba agütsü.
Iba ken o atema Congress-i BJP sorkar aija jembiogo. Prime Minister Narendra Modi-i tashiyim agi shi nung medemba aser tetsürla tebu asüba atema lumia lungkak aittsü asü masü? ta Congress tir Rahul Gandhi-i asüngdang.
Tentonü (Hombar) tebu asütsü anogo ka lia tetsürla jagi chief minister’er kima nung la sasa mi agi rongsettsü merang aser lai ashiba agi district administration-i la hotel taktang ka nung shibanga ayur ta aitsü.
La ket nung phone mesüra tzü mali aser kinük ajaklen tanükertem yuja lir ta laisa shisem.
MLA tenu aser pa den yaritepertemi taoba mapang tebu tanubo ka tepset ta tetsürlaisa tai tongloktsü. “Ni temeten aginür. Kechiba parnoki ni tatok meshiang ta rongshir? Parnoki ano kübu tanubo ka tepsetnür asü?” ta lai osangbener dang ashi.
Tetsürla tebu dak azükba video ka TV channel aika nung sayuogo aser iba nung MLA tenu aser pa den yaritepertemi kanga mejungi azükba menüngoka lir. Iba video nungsa tetsürla tebu teberem nung zübo aika keta aliba sayua lir saka kuli tejangjabo mongutet lir.
BJP MLA Kuldeep kinungtsü Sangeeta-i Lucknow nung state police tanishir O P Singh den ajurutepba sülen osangbener dang lar kibong anema yimtenren tasa ka atonga inyaker ta ashi.
“Küboba aser tetsürla den la tebu tanubo nunger dak narco test ka agitsü akhanger. Iba jagi ochiji jungkai adoktsü. Yimtenren tsütsü tasa kar atonger inyaker aser kü kinungbo tenüng menüktsür” ta Sangeeta-isa ashi.
“Kü kinungbo dak kecha tai mali aser pa dang tashiyim agi tetsür den shi nung medemer ka ta majatsü ni mempishir. Pa tesüiba küm 15 tashi yimten mapa inyaka arur aser pai loktiliba aser nübortem tenzüka arur” ta laisa shisem.
Iba tatalokba ajanga lar jalatem lesson mezüngteti timtemer, ta Sangeeta-isa ashi.
Iba ken o ya Supreme Court nung Chief Justice Dipak Misra aser Justice AM Khanwilkar o Justice D Y Chandrachud nungertem adenba bench kati angadangtsü.