BJP Mokokchung ketdangsürtemi DAC magizüker

Dimapur, Metsüremi/March 03 (TYO): Nagaland BJP state president Imna Along Longkumer melentsü atema takhangba agütsüba Mokokchung district nung BJP ketdangsür trok-i BJP district office ajanga shimtetba ‘Disciplinary Action Committee’ magizüktsü lemtet, ta sangdong ka ajanga ashi.

Ibai temzüng dak mapet, tejangja masü aser tashi kecha mali shimtetba lir, ta Nuskshi I. Ozukum, Vice President, BJP Mokokchung District; T. Nukshi Jamir, Vice President, BJP Mokokchung District; Watitemsu, Vice President, BJP Mokokchung District; Lanuyanger Longkumer, Secretary, BJP Mokokchung District; Tekanungla, Secretary, BJP Mokokchung District aser Alepla Chang, Secretary, BJP Mokokchung District nungertemi sangdong ka nung ashi.

February 22 nü senden amenba mapang district mendenpurtemi BJP Nagaland state nung lenir jenjang mejungi akumba indang tatsü-talang jembia liasü.

State tir melentsü asoshi telemtetba agiba nung BJP Mokokchung district ketdangsür troki meyongnem agütsüba record yua lir.

Iba ama tensa ka nung district secretary, Lanutoshi Convener sür ‘Disciplinary Action Committee’ ajanga komasür district office nung February 22 nü district office ajanga telemtetba agiba indang tiazü yamai jembir, ta süngmanger, ta sangdong ajanga ashi.

Anungji ‘Disciplinary Action Committee’ ta nüngja agüja alirtem yagi district mendenpurtemi telemtetba agiba nung tai aputsü tashi mali ta angatettsüla, ta kasa sangdong ajangasa ashi.