BJP MP kati Gandhi aser Nehru mezüngmeshi

Guwahati, October 22 (Agencies): Jorhat nungi BJP MP, Kamakhya Prasad Tasa-i Honibarnü lokti senden ka nung Mahatma Gandhi aser Jawaharlal Nehru na jana ona den atishia jembiba sülen Congress puri pa yimjak nung aitsüogo.
BJP MP yagi yamai ashi: “Nüburtemi Deen Dayal Upadhyaya amala tebilemdangba magizükteter kechiyong Congress puri nüburtem tekolok Gandhi aser Nehru nunger amala jana ona agi shidoktsüogo.”
Paisa ashiba agi, “Lenmang yanglushiba maparen tejakleni bener moteti lir kechiyong Sarbananda Sonowal-i aniba BJP teloki state nung sorkar kümtetba sülen nungi tzünglu aruba ajanga lenamng yanglutsüba inyakyim minpronga arudar.
Pai ashiba olen aija Assam Pradesh Congress Committee (APCC)-i Deobarnü Kamakhya Prasad Tasa anema longkak aitogo aser pa o CM Sonowal na prongla dang tatok meshitsü asoshi khanga parnoki pa noksa rongtoktsü. Maneni BJP MP Tasa puang ta khanga parnoki ken o ka benokogo.
APCC tir Ripun Bora-ia Tasa aitsüa ashiba agi, “Iba ya asen linük, nijuso atema raraba, aser asen temzüng ozüng mezüngmeshiba dang masü saka temerenshi langa aibelen tulu ka lir. Nüji nisung kati iba amala o mejembitsü.”
Kasa mapang nung Congress züngsem Tarun Gogoi, Ripun Bora aser Sushmita Dev nungeri Twitter ajanga Tasa aitsüogo.