BJP MP Pragya Thakur-i tatok meshi

New Delhi, November 29 (Agencies): Yakünü Lok Sabha nung BJP lenir, Pragya Singh Thakur-i Mahatama Gandhi khasetsang, Nathuram Godse ya linük meimer ka, ta jembiba ajanga tashishitep tulu adokba sülen Hokolbarnü lai jembiba o atema lai tatok meshiogo.
“Ni Parliament nung jembiba oji mashie angatet. Mahatma Gandhi-i linük atema inyakbaji ni akhümtsübur,” ta Bhopal nungi BJP MP, Pragya-i ashi.
Lai jembiba o atema Lok Sabha nung rongrong adokba mapang nung Thakur-i, lai Nathuram Godse ji linük meimer ka ta mashi, ta shia lai tatok meshi. Thakur-i ano tanaben tatok meshia, “Ni Nathuram Godse ji ‘linük meimer ka’ ta mashi. Ni pa tenüng metetshi, Ni kar melung yirutsüa lira ni tanaben tatok meshir,” ta ashi.
Lok Sabha nung jembidang Thakur-isa Congress lenir Rahul Gandhi-i la ya kiralongrar ta twitter ajanga aitsüba atema lai Rahul aitsü.
Brihostibarnü Rahul-i twitter ajanga, “Kiralongar Pragya-i kiralongrar Godse ya linük meimer ka ta jembir. India Parliament nung tejashitsü anogo ka,” ta lemsatepa liasü.
Iba dak sendakba nung Thakur-i, “Kü dang kiralongrar ta ajabaji tenüng menüktsüba lir. House nung züngsem kati kü dang kiralongrar ta ajar. Ya ni tilutsüba lir. Court nung ni anema benokba kuli magutsüteter,” ta ashi.
Lok Sabha nung DMK lenir, A Raja-i Godse-i Gandhi khasetba kuli court nung agütsüdang jembiba o ka lepshia jembidang Thakur-i Godse ji linük meimer ka, ta jembiba ajanga rongrong tulu adok.
Pragya Thakur-i Godse ji linük meimer ka, ta jembiba o BJP-i aitsüogo, aser BJP-i Parliamnet senden agidang BJP parliamentary party senden nung medendaktsütsü lemtetba den külemi la Parliamentary committee on defence züngsem nungia anendaktsüogo.