BJP Nagaland-i 38 buba Foundation Day benjung amung

Kohima, Rongchii (April) 6 (TYO): BJP Nagaland State Unit-i Rogonü (Hokolbar) 38 buba Foundation Day ayongzüka amung aser iba mapang party mapa inyakertem dang Nagaland nung alirtem tenzüktsü atema bendanga agütsüshitsü tayongzükba agütsü.
Tanü Kohima nung aliba BJP Nagaland State office nung iba benjung amung.
“NDPP-i aniba PDA sorkar nung BJP MLA 12 dena lir aser onok ya nübortem tenzüktsü atema shimba lir” ta Higher and Technical Education Minister, Temjen Imna Along-i ashi.
BJP ya state sorkar nung teyariteper ka lir aser iba nungji ajemdaker BJP züngsemtemi tajangzük agitsü bilema alitsü akok. Ajisüaka, onok ya nübortem tenzüktsü atema shimba lir aser onoki iba mapaji inyaktsü. Anungji, Nagaland nung BJP mapa inyakertemi temelenshi bener arutsü atema yariteptsüla. Nenoki nübortem aser sorkar tsüngda apu alatsüla, ta Imna Along-isa ashi.
BJP-i azükaru, terenlok aser ochimashi maliba state ka kümdaktsütsü tebilemba dak alia tanga tebilemba kecha mali ta nübortem nem metetdakjang, ta paisa ayongzük.
Paisa BJP züngsemtem dang taoba Prime Minister Atal Behari Vajpayee aser pai Naga nunger asoshi inyakba mapatem bilemtetang ta ayongzük.
BJP ya linük tangatetba nung amendaker tentetba telok ka lir aser BJP-i nübortem asoshi terenlok aser azükaru bener arutsü atema alizüng yua lir. Anungji, tarutsü anogotem Naga nungertemi bilemtettsü atema BJP State unit-i tamendak shitak amentettsüla ta Minister Imna Along-isa shisem.
“Asenok nübortem asoshi tenarong aser tenüktem asütsü aser yimtsüng nung sensaktiba atema teka aser tetsüngtem ama asütsü. Asenoki ochimashi inyakyimtem anema noktaktsü” ta paisa ashi.
Iba benjung nung taoba BJP Nagaland president aser MARCOFED Chairman, Dr M Chuba Ao-ia BJP Party indang alizüng aser sentongtem indang osang metetdaktsü.
BJP indang tangatetbaji tamangba yimsü tilatem nungi nisungtem Hindu yimsü agizükdaktsütsü atema masü saka linük tenzüktsü atema nübortem anitettsü atema lir, ta Dr Chuba-i ashi.
BJP Nagaland Media Cell, K James Vizo-ia BJP MLA tem dang assembly election nung nüboyimba mapang nübortem dang nangzükba ama inyaktsü ayongzük.
Sentong nung mendenji BJP Nagaland vice president Kuputo Shohe liasü, SABCK Pastor Himali Kiba-i temoatsü meshia sarasadem, BJP Secretary Lima Onen Chang-i tesentepertem pela agizük aser BJP Nagaland Mahila President Sano Ngullie-i anküp tepela o jembi.