BJP Nagaland-i Delhi nung lennir aika den ajurutep

Dimapur, September 7 (TYO): Tesüiba anogo 8 tashi Nagaland State BJP unit nungi teshimtet telok kati Delhi nung Central BJP lennirtem aser Union Ministry balala den ajurutepa sendentem menogo, ta BJP Nagaland sangdong ka nung metetdaktsü.
Senden balala nung parnoki State party maparen aser State nung terenlok mapa indang onüktem benoka lemsatep, ta sangdong nungsa shia lir.
August 6 nü Nagaland State BJP teloki Minister of DoNER & Department of Atomic energy & space, Dr Jitendra Singh den ajurutep aser iba mapang Minister-i takok lenmang ajak agi party yariteptsü nangzük. Iba senden nung DoNER Minister, Chief Minister aser State BJP telok tekaratiba nung ajuruteptsü aser DAN tashi itshidaktsütsü atema sentongtem atongtsü lemtet, ta BJP Nagaland sangdong nungsa metetdaktsü.
State BJP President, Visasolie Lhongue lenisüba nung teshimtet telokisa Union Minister of rural Development, Narendra Singh Tomar aser National General Secretary (HQ), Arun Singh na den ajurutepa senden amen. Parnoki ano anogo ananü Delhi nung amungtsü aser iba mapang National President, Prime Minister aser centre nung lennirtem den ajuruteptsü, ta sangdong nungsa shisem.