BJP Nagaland-i jangjashitsür

Dimapur, May 23 (TYO): Bharatiya Janata Party ya secular political party ka lir aser democratic state ka tentettsü alizüng yur mapa inyaker, ta Media Cell, BJP Nagaland-i sangdong ka nung metetdaktsü.
Nagaland BJP-i Khristan yimsü aser nübo agi tangar meneneper taginübatem kümzüka ayutsü lemtetba agizükba atema NBCC dang pelar. BJP Nagaland-i maneni Khristan yimsü kümzüka ayutsü, saka India Constitution ajanga senso shia nem ‘freedom of religion’ agütsüba ama tanga tamangba yimsütema akümtsübur, ta parnokisa ashi.
Taoba Prime Minister, AB Vajpayee ya December 25 nü aso aser India sorkari pa tasoba anogo nung Good Governance Day amungtsü lemtetba ajanga Christmas anogo den ajurushir. Ajisüaka, Nagaland BJP aser state sorkar December 25 matongdang mesüra süir ang Good Governance Day amunger, ta BJP sangdong nungsa metetdaktsü.
India sorkarisa Indian Constitution tebu Dr B.R. Ambedkar tasoba anogo April 14 nung India Digital Day amungtsü lemtet. Taküm iba anogo nung Good Friday ajurushi, ajisüaka küm shia Good Friday anogo melenshia amunger, ta parnokisa shisem.
Prime Minister-i nashi anükertem anema nokdaker aser Union Minister Smriti Irani-i May 21, 2017 nü Indian Today Editor senden nung BJP-i nashi anükertem anema nokdaker ta nenshia metetdaktsüogo, ta Media Cell sangdong nung metetdaktsü.
October 14, 2016 nü India Christian Council-i ayongzükba sentong nung Home Minister Rajnath Singh-i India ya secular linük ka lir aser nübortem ajak yimjung nung alitsü atema aremzüktepa alitsüla ta ashi.
India nung tamangba yimsü ajak yimjung nung alir aser tetsübu kecha melii tamangba yimsü sadoka amangteper aser iba jagi India ya taremzük adokdak reju ka lir, ta Rajnath-i metetdaktsü.
Home Minister-isa ashiba agi, Linük nung St. Thomas nungi Mother Theresa nungeri loktiliba nungi temenentem agientsü atema mapa inyak aser parnok mapaji India-i kodanga mamatsü. India nung tamangba yimsü anema mapa meinyaktsütsü aser Khristantem kümzüka ayutsü, ta Media Cell BJP Nagaland-isa sangdong nung ashi.