BJP Nagaland-i joint declaration nung madener

Kohima, Aenjeti 30 (TYO): Nagaland nung political party 11-i taruba State Election nung shilem magitsü ta telemtetba agir külem sangdong ka agütsüba sülen BJP-i iba sangdong agütsüba nung madener ta metetdaktsüogo.
Iba onük atema national lennirtemi ang telemtetba agitsü ta BJP-i metetdaktsü.
Yashi Hotel Japfu nung Core Committee of Naga Tribal Organisations and Civil Societies-i ayongba senden nung Nagaland nung political party 11-i ‘solution before election’ pusema nungita assembly elections nung shilem magitsü telemtetba agi.
Tanü BJP Nagaland President Visasolie Lhoungu-i iba osangbener den jembidang, BJP-i ‘solution before election’ ta asübaji agizüker saka yashi political party 10 den külemi Joint Declaration nung sign asübabo magizüker ta ashi.
Taoba Minister aser BJP State Executive Council Member Kheto Sema-i yashi declaration nungji sign asü.
Yashi Core Committee nung Convenor, Theja Therieh-i osangbener den jembidang, “BJP State President Lhoungu-i kü dang phone ajanga pa senden nung medenteter aser BJP tenüng nung Kheto adener ta ashi” ta metetdaktsü.
Pai Kheto ji senden nung adentsü yok saka joint declaration nung sign asütsü atemabo temelaba magütsü ta tanü Lhoungu-isa metetdaktsü.
“Onoki nisung ana senden nung adentsü yok saka onoki tena dang election dak sendakba onük kar adokra National lennirtem den asüngdangyatsüla ta ashi” ta paisa shisem.
Kheto-i Central lennirtem den asüngdangya mesüi sign asübayong pa party nungi anentsüogo, ta State BJP president-isa metetdaktsü.
Naga yimten tekaraba nung latettsüba nung BJP-ia pusema nungiter saka state election ya onük khenyongi balaka aser BJP State Unit-i iba atema Central lennirtem dang nungi telangzüba ka angutsü atar, ta paisa ashi.
BJP-ia ‘solution not election’ agizüker asü masü ta osangbeneri asüngdang dang, “BJP central lennirtemi Core Committee of the Naga tribal organizations aser Naga yimten teloktem den jembishinü asüba sülen ang onoki tatembang telemtetba agitsü,” ta Lhoungu-i langzü.
“Tekaratiba nung parnok den olemteptsü aser ibaji masü tashi BJP State Unit-i kecha meshitettsü. Senden amenba sülen ang nomination asütsüba indang telemtetba agitsü,” ta paisa shisem.
Tsüklai 17 nü state Assembly election nung shilem magitsü ta shiaka NPF aser BJP tsüngda tesentaktep yur tokteptsü tenangzükba agishiogo aser menden lemsatsü atema jembishinüdar.
Nagaland nung BJP atema election in-charge Union Minister of State for Home Affairs, Kiren Rijiju den BJP national secretary i/c of North East, Ram Madav na yashi Nagaland-i aru aser pre-poll alliance den menden lemsatsü indang onüktem jembi, ta BJP Nagaland Unit nung ketdangpur kati ashi.
NPF party-i Chiteni 17 nü BJP den tesentaktep malitsü telemtetba agi saka Aenjeti 23 nü NPF Central Executive Council senden nung maneni BJP den tesentaktep alitsü telemtetba agi.
Rijiju aser Madav nati Chief Minister T R Zeliang aser NPF President Dr Shurhozelie Liezietsu na den senden amen aser idangji pre-poll alliance aser menden lemsatsü indang onüktem jembi, ta BJP media cell convenor K James Vizo-i osangbener dang ashi.
State BJP nungi lennir ana nem NPF den menden lemsatsü indang onük jembitsü mapa nungloktsüogo, ta Vizo-isa shisem.