BJP Nagaland-i NDPP den tesentaktep meyunür

Kohima, Tsüklai 3 (TYO): Yashi New Delhi nung BJP aser Nationalist Democratic Peoples’ Party (NDPP) tsüngda tesentaktep alitsü nangzüktepaka BJP Nagaland state unit-i anir district level unit tem aser party mapa inyakertemi tezü atangba metetdaktsüogo.
Tsüklai 2 nü party junga amenteta maliba NDPP den tesentaktep alitsü lemtetba atema mepelar ta BJP Nagaland president Visasolie Lhoungu aser general secretary Eduzu Theluo nati BJP President Amit Shah dang shidi ka nung ashi.
Züngsem 60 agi akümba Assembly nung menden 20:40 lemsatsü telemtetba agiba atema jashir, kechiyong BJP den tesentaktep ayutsübaji NDPP-ia mezüng asüngdangba liasü, ta shidi nung shia lir.
“BJP Nagaland dang candidate 45 shi kati party ticket meshir aser anogoshia party tashi taitba akümer, anungji NDPP dang nungi asenoki ang menden teimba nung takok angutsü teimla lir. Iba dak sendakba nung menden lemsateptsü lemtetba ajanga tetsükdaktsü ajurutsü” ta BJP Nagaland-i Amit Shah dang ashi.
BJP-i shinga dena tesentaktep meyui dang toktep nungbo menden aika nung takok angutsü aser tanga party nungi MLA temia BJP nung adentsü mapang ajurutsü. Iba jagi Nagaland State BJP-ibo party shinga dena pre-poll alliance meyunür, ta parnokisa ashi.
“Onoki taruba assembly elections nung pre-poll alliance melii dang tokteptsü telemtetba agir aser nüngdak süra post-poll alliance alitsü akok. Iba telemtetba ya district units aser morchas den kanga junga asüngdangya asüba sülen agiba lir” ta Nagaland BJP-isa Amit Shah dang ashi.
Maneni, district 11 nungi BJP unit tem aser tongti telen ajaki kasa shidi agütsüdar.