BJP Nagaland lenirtemi Home Minister Rajnath agizük

Dimapur, December 08 (TYO): December 7, 2017 aonung State Bharatiya Janata Party Nagaland nungi teshimtet telok kati Union Home Minister, Rajnath Singh Dimapur tonga aruba sülen Police house Chumukedima Nagaland nung agizük, aser Nagaland dak sendakba onük aika nung o lemtepa liasü, ta tanü Media Cell BJP, Nagaland sangdong ka ajanga metetdaktsü.
Party lenirtemisa Union Minister aser taoba BJP National Tir, Rajnath Singh nem state nung party mapatong balala indang metetdaktsüba den külemi party maparen atema State incharge (Prabhari) ka aser Minister incharge ka nüngdaker ta ashi, ibaji langzüa Union minister-i iba atemaji inyaktsü, ta metetdaktsü.
Taoba mapang, 2007 küm August ita nung BJP National Tir inyakdang pai Chumukedima, Nagaland semdangba mapang jembiba bilemeta lenirtemi jembi. Iba mapang nung pai, BJP atema Nagaland asoshi maongka balaka lir, kechiyong Northeast nung Nagaland-i mezüng sorkar agütsü, ta ashi. Paisa, taruba mapang pai state semdangbaji Party nüngdak atema asütsü, ta ashi.
Yasüng Union Minister Rajnath Singh agizükertemji- State BJP Tir, Visasolie Lhoungu, taoba state BJP Tir, Dr M.Chuba Ao, Ananta Mishar Secretary organisation, Mahesh Kotecha Treasurer, K.James Vizo Media Cell Convener aser Temjen Along Finance committee convener nunger liasü.