BJP Nagaland lennirtemi Karnataka nung nüboyimtsür

Dimapur, Monupii (May) 4 (TYO): State Bharatiya Janata Party (BJP) Nagaland unit nungi teshimtet telok ka Karnataka legislative assembly election atema Monupii (May) 8, 2018 tashi Karnataka nung amungtsü.
Iba teshimtet telokji BJP lennir & Deputy Chief Minister cum Home Minister & National Highways Y. Patton lenisüba kübok lir aser Health & family welfare Minister S. Pangyu Phom o Secretary Organising Ananta Mishra na dena lir.
Tanü parnoki State BJP Office, Bengaluru nung All India BJP General secretary Muralidhar Rao den ajurutep aser North east nisungtem aser talisa Nagaland sensotem den tongteptsü atema sentongtem atong. Karnataka nung NE nunger nütsüng lakh 8 shi lir aser Nagaland state kija nung nisung 8,000 shi lir, ta Media Cell BJP Nagaland sangdong ka nung metetdaktsü.
Monupii (May) 6, 2018 nikongdang 4:00 ako nung “North East Samavesha” ta ser sentong ka Palace ground, Gate No.1, Bengaluru nung agitsü.
Iba sentong nung North East state tem nungi Chief minister tem aser tanga Minister tem adentsü aser tongti o jembirji National BJP tir Amit Shah asütsü.
State BJP General Secretary Jaangsillung aser taoba State President Dr M. Chuba Ao na Bengaluru nung mungzükdar aser tenati Nagaland nungi kaketshir lennirtem aser Bengaluru nung aliba North East nunger den ajurutepa arudar.
Karnataka Legislative Assembly campaign atema teshimtet telok nung Higher & Technical Education Minister, Temjen Imna Along densema lir.