BJP Nagaland Unit-i jangjashitsür

Dimapur, Monupii (May) 21 (TYO): Taoba Nagaland Chief Minister TR Zeliang-i NDPP dang kechiba taoba Minister & BJP State executive züngsem Kheto Sema aser State BJP Vice President Tsasepi Sangtam na merenshiba meyipa magir ta asüngdangba atema Bharatiya Janata Party Nagaland Unit-i telangzüba agütsüogo.
BJP ya National party ka lir aser Central lennirtemi tuyuba sülen anidaker. Osang junga tongtepratep masüba ajanga lennir ana party nungi anentsü saka Central BJP lennirtem den asüngdangya asüba sülen February 2018 nung tena nem ‘suspension order’ agütsüba meyipa agi aser iba osangji osangkakettem nunga sangdongogo, ta Media Cell, BJP Nagaland-i osang jangjashitsü.
Iba onük ya NDPP den alidang masü saka hief Minister TR Zeliang lenisüba kübok DAN sorkar alidang adok, ta parnokisa ashi.
NPF sasep nung khuret tuluba yur TR Zeliang-i BJP telung maparen atema tebilemtsü abenba angudang menünür. Talisa Manipur unit nung parnok khuret tulu ajurua lir. BJP Nagaland-i onok sasa anepalutsü koka lir kechiyong high command-i onok len anir, ta Media Cell sangdong nung metetdaktsü.