BJP Nagaland Unit tir den BJP, 21 Tuli Mandal dena lir

Dimapur, Tsüklai/February 26 (TYO): Mokokchung District nungi BJP lenir kari Nalin S Kholi, BJP In-charge, Nagaland dangi shidi ka zülua kasaji osangkaket nung February 26, 2021 nü adoka BJP Nagaland Unit tir Temjen Imna Along tenüng menüktsütsü merangba ya kangasa tia maka, ta BJP, 21 Tuli Mandal ajanga sangdong ka nung ashi.
Nagaland nung BJP ya tashi tait national party ka kuma BJP Unit, Nagaland tir Temjen Imna Along Longkumer lenisüba kübok region nung dangari mera keta reprangtsüsa aliba mapang lenir kar pei tejangraba ajanga Party tetsüng metsüdakba long ka ama akumer.
Ajisüaka Temjen Imna Along dak party tir ka inyaktsü sempet aser tashi ya pa den tokteper aser party nung inyaker temi senzüka yutsütsü makok mesüra sendokatoktsü makok aser ibai nübur ajungai kanga junga meteta lir aser paidoktsü makokba ochi lir, ta BJP, 21 Tuli Mandal tir, Nuklutemjen ajanga sangdong nung shia lir.
Anungji BJP 21 Tuli Mandal tenüng nung tang BJP Nagaland Unit tir dak onoki tamang kateta lir, ta nenshia metetdaktsür aser tamendak dak tejangja makai aitsüba ajanga Central nung lenirtem manokshitsütsü ta ozü tamang lir.
Party ya cadre base ka asünung, tilatiba jenjang nungi ola adokba ya senzüka meyutsütsüla aser lenir kar tejangraba ajanga Party renlokba nung timtem magütsütsüla, ta sangdong ajanga ashi.