BJP-NDPP-i JD aser Independent dena sorkar akümtsü

Kohima, Metsüremi (March) 3 (TYO): Bharatiya Janata Party (BJP)-Nationalist Democratic Progressive Party (NDPP) teloktepi Nagaland nung küm 15 tashi Naga People’s Front (NPF)-i sorkar ketdangsüa aruba anendaktsüogo.
Taoba mapang asemben tashi Chief Minister inyaker Neiphiu Rio-i anir BJP-NDPP teloktepi Nagaland sorkar akümtsü.
11-Northern Angami-II Assembly Constituency nung tetokteper shinga melii Neiphiu Rio-i takok ngua liasü aser tanü Assembly menden 60 nungi 59 indang votes azüng.
Nagaland nung kodanga mangashidangba election osang tanü angashiogo aser ibaji BJP-i 2013 State Assembly election nung menden ka atema dang takok angu saka takümbo parnoki menden 12 nung takok nguteta liasü. Külen NDPP-ia menden 17 nung takok angu.
Nagaland nung sorkar tebendak NPF-i menden 27 nung takok angu aser ibaji 2013 election nung anguba dang nungi menden 11 agi tajemba lir.
NPF-i Nationalist People’s Party (NPP) aser Janata Dal (United) teloktem den tesentaktep yur toktepa liasü aser NPP-i menden 2 nung aser JD(U)-i menden ka nung takok nguogo.
Taküm election nung Independent candidate kati dang takok angu aser paji taoba Naga Students’ Federation (NSF) tir Tongpang Ozukum lir. Pai Mokokchung district kübok Angetyongpang constituency nungi takok angu.
Ajisüaka, NPF-i menden teimba ngutetaka sorkar akümtsü atema khuret ka ajurua lir aser ibaji Satakha A/C nung takok anguba JD(U) candidate G Kaito Aye aser Independent candidate Tongpang Ozukum nati BJP-NDPP teloktep nung adentsü lemtetba ajanga lir.
Tena BJP-NDPP teloktep nung adenba ajanga parnoki sorkar akümtsü menden 31 abensaogo.
Taonung CEO Nagaland Abhijit Sinha-i osangbener senden ka nung election result metetdaktsüdang, NPF-i menden 27, BJP-i menden 12, NDPP-i menden 17 (Rio dena), NPP-i menden 2 aser Independent kati takok angu, ta ashi.
Ajisüaka, CEO Nagaland-isa teratatsü osang ka metetdaktsü aser ibaji Tening A/C nungi NPF candidate Namduadi Rangkau Zeliang-i takok angubaji sota atar kechiyong iba constituency nung vote tanaben züngshir ta ashi.
Taonung osangbener senden nung Additional CEO N Moa Aier dena liasü.
CEO-isa candidate tem tsüngda takok anguba telemsa meshitet aser talisa Noklak A/C nung BJP candidate H Haiying-i minister P Longon madak vote pungu (5)-i dang takok anguba indang pai jangja meshitet.
Iba jagi osangbenertemi pa dang osang tejangja ashitsü ashi saka CEO Nagaland-i ghonda ka tesadang sülen osang metetdaktsütsü ta nangzük saka iba sülen pa den par ketdangsertem aser CEO media cell temi tatembang result indang osang kecha melemsatep.
Takok angurtem:
NPF nungi Chief Minister T R Zeliang-i NDPP Iherie Ndang madak vote 5432 agi akok.
Pungro-Kiphire A/C nung NPF nungi T Torechu-i kümsük pezübuba atema vote 473 agi takok angu.
Rural Development Minister, C L John-i Tehok A/C nung kümsük asemben atema vote 4556 agi takok angu.
Dimapur-III nung NPF candidate Azheto Zhimomi-i taoba minister Tokheho Yepthomi madak vote 2138 agi takok angu.
Tamakok angurtem:
Mokokchung Town A/C nung NPF nungi MLA C Apok Jamir-i taoba Rural Development Department Director aser NDPP candidate Metsubo Jamir den vote 1004 agi tamakok angu.
59 Seyochung-Sitimi A/C nung Power Minister aser NPF candidate C Kipili Sangtam-i BJP candidate V. Kashiho den vote 1162 agi tamakok angu.
Taoba chief minister K L Chishi-i MLA Picto Shohe den vote 838 agi tamakok angu.
Tening A/C nung NDPP candidate MLA Namri Nchang-i NPF candidate Namduadi Rangkau Zeliang den vote 32 agi tamakok angu.