BJP nung adenba atema Muslim nunger kibong 25 anema inyak

Agartala, June 21 (Agencies): Tawa South Tripura kübok Shantirbazar sub-division nung Muslim nunger kibong kar BJP nung adenba atema ‘mosque’ kati maitdaktsüba asoshi CPI-M pur aitsüogo.
District ketdangsertemi ashiba agi, parnokia iba osang angazükogo saka tang tashi nung item kibongtemi kecha osang tejangja agüja mali.
“Nisung kari danga tamangba yimsüren nung temeten agüja aliba tsütsü kar nem danga meinprong agütsüra, ketdangsertemi nüburtem temetentem kümzüka ayutsü asoshi tapet inyaktsü,” ta South Tripura, District Magistrate, C K Jamatia-i ashi.
BJP Minority Morcha tir, Md Jasimuddin-i ashiba agi, CPI-M züngsemtemi parnok amokmerenba osang tejangja Superintendent of Police (South) nem agütsüogo. Paisa ashiba agi, CPI-M züngsemtemi kanga nokdanga, taoba ita Shantirbazar kübok Madhyatilla nung alir kibong 25 nungi parnok 200 shi CPI-M doktsür BJP nung aden
“Item kibongtem lokti nungi sentok aser sorkari teyari agütsüba kecha magütsütsü ta amokmeren. Iba sülen parnok BJP nung adenba mapang nungi tenzüka MGNREGS mapatem aser sorkar nungi teyari arubatem magütsü. Hopta ka tejakdang CPI-M party puri Muslim nunger tamangba yimsü nung lenirtem ajungmesoa item kibongtem nokdang,” ta Jasimuddin-i ashi.
Parnok BJP nung adenba ajanga putiri parnok nem ozüng agütsüba mezüngbo parnoki anem. BJP ya Hindu pusemba party ka lir aser parnoki Islam anema inyaker, ta nisung ka tenüng agi, Babul Hossain-i ashi.
BJP nungi teshimtet telok kati district SP ajurua pa dang item kibongtem nem security agüjang aser parnok tekülem kidang otettsü atema inyaktsüla, ta takhangba agütsüogo.