BJP nung agizükbaji election ticket agütsür masü

Dimapur, Oct. 02 (TYO): Nagaland nung nisungtem BJP telok nung arua adenbaji election mapang BJP ticket agütsütsü asoshi tendaktsür masü ta BJP Nagaland ajanga metetdaktsüogo.
Nisung aika BJP telok nung adenba atema pelar ajisüaka election atemabo kodang town, municipal aser assembly election mapang tongdir, idangji tejangrartemi party ticket asüngdangtsüla aser shibai nübortem jenjang ajungketja yimsü sütettsü, iba ama nisungji repranga BJP teloki ticket agütsütsü ta BJP Nagaland nung tongti zülur (Media) Jaangsillung Gonmeii metetdaktsü.
Kasa sangdong nungsa ashiba agi, Nagaland nung taoba MLA asem tashi tawa BJP telok nung denogo. Parnokji  I.K.Sema, Kheto Sema aser L.Temjen Jamir nungertgem liasü. Parnok rongnung I.K.Sema Advisory Board nung shimogo.
Ato kilonser, Narendra Modii linük nung ochimashi mapatem merüktettsü asoshi ayongzükba ken  o langzüka BJP telok nung adenba asoshi pelar ta BJP lenirisa metetdaktsü.