BJP nung arishi küm 75 ser temapur lennirtem anisüngzükdaktsür

New Delhi, March 23 (Agencies): BJP-i arishi küm 75 ser temapurtem elections nung metoktepdaktsür.
Gandhinagar constituency nung LK Advani melena national president Amit Shah nem ticket agütsüba sülen Nainital nungi Bhagat Singh Koshyari (76) aser Pauri nungi BC Khanduri (85) na nema ticket magütsü.
Külen Himachal Pradesh kübok Kangra nungi Shanta Kumar (84)-ia election nung metokteptsü ta osang metetdaktsüogo.
BJP züngsem kari ashiba agi Kanpur nunga lennir tejen Murli Manohar Joshi nem ticket magütsütsü akok aser Lok Sabha Speaker Sumitra Mahajan-ia Indore nung ticket angutsü asü masü’ar meshiteter. Sumitra Mahajan ya taküm arishi küm 76 ajungtsü.
Madhya Pradesh nung BJP lennir tejen Satyanarayan (79)-i taoba hopta “Speaker Mahajan nem ticket magütsütsüla kechiyong lai lar constituency nung alirtem den tesentaktep mali kecha mayur” ta ashi.
“BJP-i Sumitra Mahajan nem tugubenbuba atema ticket agütsüra, ni la anema Independent candidate ka ama tokteptsü. Iba tesem nung alir BJP züngsem aikati la dang tezü atanger kechiyong lai osangtsüsang magiteper aser Indore nung mapa kecha meinyaktsü” ta Satyanarayan-i metetdaktsü.
Jharkhand nunga BJP lennir tejen aser Khunti MP Kariya Munda melentsü akok. Pa arishi küm 84 tain lir.
Bihar nung Hukum Dev Narayan Yadav (79)-i politics nungi anentsü jangrar ta shiogo aser tanü BJP-i Hukum’er jabaso Ashok Yadav nem Madhubani indang ticket agütsüogo.
Uttar Pradesh nunga Deoria MP Kalraj Mishra arishi küm 75 dak tema tain lir aser pai par party dang election nung metokteptsü ta shiogo.
Narendra Modi’er cabinet nung lennir tejen aser minister tem- Sushma Swaraj aser Uma Bharti nati temang manemba onüktem amer elections nung metokteptsü ta metetdaktsüogo.