BJP Parliamentary Board-i UP aser Uttarakhand CM shimtsü

New Delhi, March 12 (Agencies): Uttar Pradesh aser Uttarakhand assembly elections nung BJP-i majority ngua takok anguba sülen iba state ana nung Chief Minister shimtsü atema Deobar nikongdang BJP Parliamentary Board senden amentsü, ta osang ka ajanga metetdaktsü.
Parliamentary Board-isa Goa aser Manipur na atema-a jembitsü. Bharatiya Janata Party-i iba state ana nung majority mengutetaka party-i tanga party tem teyari agia sorkar akumtsü atema merangdar.
Honibarnü BJP National Tir, Amit Shah-i, Deobarnü Parliamentary Board senden mena party atema nüngdaktem jembitsü, ta metetdakja liasü.
Iba dak alia Board-isa tang assembly elections nung tasen shimba MLA tem den senden ayonga amentsü atema peipei state nungi ‘observers’ shima tenüng sangdongtsü.
Parliamentary Board züngsem 12 rongnung Ato kilonser, Narendra Modi aser BJP National Tir, Amit Shah na dak alia Union minister tem- Rajnath Singh, Arun Jaitley, Nitin Gadkari, Sushma Swaraj, Venkaiah Naidu, Ananth Kumar, Thawarchand Gehlot aser JP Nadda nungera densema lir.