BJP party masü Kaziranga party

– Takolong, Chuchuyimlang.

Tanü asen Naga lima Nagaland for Christ ta tasü itta shitettsüsa mapa agi Abraham ama Tsüngrem dak amanger aikabo mali südi ta temulung shirangseta iba ocet tenzüker.
2016 küm Dimapur nung osangbenertem sentong ka nung Nagaland Governor Archaya-i yamai ashi, Tanü Naga nungertemi tebang agibo Nagaland for Christ ta jembir, saka mapa agibo Christian tajung ka ama mangur ta ashibaji kanga shitak, aser aji Yisu dak amanger asen Naga nunger dang ashiba taaktsü o tulu ka lir. Ano 2016 kümsa Dalai Lama Arunachal-i arudang yamai ashi, Tanü alima kanga mejungi raksaogo, anungji Tsüngrem dak amangba aser sarasademba kisüng agibo makoktsü, saka tejak o tejak na ajurutepa melenshidaktsütsüla ta ashibaji tanü asen Naga nunger dang ashiba ama asenoki bilema inyaktsüla. Tanü asen Naga lima nung tamalen shia aruba ama Abraham ama tamang tulu Tsüngrem dak amanger aika mali, oda tiazü tamangertemi nisung majunger atema jembir masü, saka party majungba indangang jembir, talisa BJP party indang jembiba angashir, anungji tanü tangatetba tajung nung ola ka ayimoktsür. Party ajak tajung dang, saka nisung majung ta metettsüla aser aji oda party ajak nung tanishir nisung tamajunger ajakji melentsüla. Political party mashi kati asen Naga lima raksatsütsü makok, saka party nungi ochi mashir tanishir shimtetba ajanga tanü lima tarutsü timla ajak samatsüogo, ya Nagaland BJP party tai asü? masü ya nisung tai, anungji nisung tamajunger party mashi ka nungi süaka leader asütsü nüngdak madoker, ya shiba tai? ya ni aser na tai, leader shimdang asenok Yisu dak amangertemi tanishir tamajung oda ali kimong, bank account, RCC buildings, kinünger etc, item nung tang tenük yokertem azü tamajung tanishir election nung shimteta ayuba ajanga oda tanü dang masü, saka tarutsü lanu putu tashi mangdang maliba tamalen shia aluogo. Anungji jok roka asoa alulenji khen reprangzüka yokdi. Kechiaser alu mena lir tanü ni aser nai tasü itta mapa tajung inyakra asüng asen chirtem tsükbong tajung ajak bendentsü anungji arishi tatsüka alidang ochi nung tasü itta oda party masü, saka azü tajung tanishir shimtsüla, aji oda süra asüng sür yanü lanu asensortem ayipjanga mejangtettsü. Tanü Nagaland BJP nung tena aliba nisungtemji tajung süaka majung süaka India nunger masü, tanüa masü ano tarutsü nunga kodanga masütsü, kechiaser asen Naga nunger tekolok meraksa tashibo nüchiso bushiba wadang matemtsü. Kechiaser Naga nunger azü tajung tanishirtemji Delhi nungi ashiba dang anga inyaktsü shimtetba tanishir masü, saka asen Naga nunger azü den apet inyaktsü Naga nungertemi shimtetba tanishir lir. Kechiaser Delhi Hindu mesüra Delhi Muslim yimsü amangertemi asen Naga nunger leader shimtet masü, saka asen lima yimsü asütsü asoshi asen nisung asenoki shimtet, anungji tatsüba agi tamangba yimsüjibo doktsür asen Naga nunger sobaliba tajung alirtemi sobaliba maliba Hindu nungertemi ashiba inyaktsü tamakoktsü aser nüngdak madoker.
Tanü Kaziranga party ya kechi koma party ka, aji tanü asen Naga nunger ajak den lemsateper. Kaziranga party ya Political party ka masü, saka iba Kaziranga tesem ya jabujari aser amajok watidak, aji dang masü, saka koda sür taküm ka tembangtsütsü, ano koda sür alima rangben telongi yoktsü ta renemba tesem kanga dang tajung, oda asen Nagaland ministertem asoshibo iba Kaziranga ya Hollywood tesem ama kümdaktsüogo.
Süra parnok ya Hollywood nung amongtsü shimtet asü, Nagaland nung asen Naga nunger yaritsü shimtet (?) Kechiba ochi mashi Kaziranga nisungtem anema ola madoker (?) Tiazü nung tebang agi Yisu dak amanger ajak amui ao asü koda (?). Joko tanü nungi party otsü jembiba ajak doktsüdi, saka maneni Kaziranga nisungtem asoshi tarutsü nung parnok nükla ajak samajang ta asen Tsüngrem dang sarasadem ola yokdi arung.
KUKNALIM