BJP pur Tripura nung nüboyimba sentong December 27 nungi tenzüktsü

Guwahati, December 21 (Agencies): Left-front puri tang yimsü tesüdak state Tripura nung BJP puri election atema nüboyimba sentong constituency 60 prongla nung December 27 nü rally 60 ayongzüka tenzüktsü. Tripura nung taruba küm tetenzüklen election agitsüba lir, aser BJP puri iba atema state ajunga nung nüboyimba sentong tarensena yanglua lir, kong minister, MP, MLA tem aser Assam, Arunachal Pradesh aser Manipur nungi BJP ketdangpurtemi shilem agitsüba atema renema lir.
Assam aser Arunachal Pradesh nung BJP puri yimsü tesüdak lir aser kasa mapang nung Manipur nunga BJP puri aniba sorkar ka kümteta lir.
BJP pur Tripura in charge, Sunil Deodhar-i ashiba agi, “Onoki election atema nüboyimba sentong December 27 nungi tenzüktsü.” Ato Kilonser Narendra Modi, BJP national tir Amit Shah aser Uttar Pradesh chief minister Yogi Adityanath nungeri Tripura nung nüboyimba sentong nung shilem agitsü.
January tetenzüklen Tripura nung rally balala nung central minister temi shilem agitsü. “Onoki January ita mezüngbuba hopta nung Ato kilonser mesera Amitbhai mesera Yogiji nunger rally ka nung shilem agidaktsütsü asoshi merangdar,” ta Deodhar-i ashi.
Maneni BJP puri state nung Ato Kilonser nem rally ka nunga danga shilem agidaktsütsü asoshi kanga meranga inyakdar.
“State nung OBC voters shilem 35 lir aser parnok rongnungi shilem 90 bo Nath aser Debnath kin nungi lir aser parnok ya Gorakhnath sülen anidakertem lir. Yogi yaa Gorakhnath nütsüng ka lir,” ta BJP lenir kati ashi.