BJP puri masü Garo nungertemi Hindu nunger kümzüka ayur: Marak

Tura, June 05 (agencies): Bharatiya Janata Party (BJP) toktsüba sülen taoba mapang telungpur aliba politician akümsang Bernard N Marak-i maneni BJP pur aija parnok indang onüktemji lokti tuluba kati magizüker ta ashi. Paisa ashiba agi BJP puri masü saka Garo nungertemi iba tesem nung Hindu pur taginüba aser tejangrabatem kümzüka ayur.
“Putu aika Garo Hills nung BJP puri masü saka Garo nungertemi Hindu nunger lokti kümzüka arur. Hindu nungertem Tura Samshan Ghat ken o mapang mesüra parnok tenüng electoral roll nungi indoktsü dang BJP pur maliasü,” ta Bernard-i ashi.
Taoba BJP züngsem-isa ashiba agi BJP pur onüktem Garo Hills nung meindaktsütsüla.
“Iba ajanga Garo Hills nung kin tilatem atema tetsükdaktsü adoktsü. Garo nunger ya Hindu nunger medemer lir aser parnok Garo nunger tesem nung alir asünung parnok kümzüka ayutsüji Garo nunger teinyaktsü lir. BJP puri Garo nunger anemba jangjaogo aser parnok miim onüktem ajanga Garo Hills nung Garo nunger masürtem aika ki maka akümtsü,” ta paisa ashi.
BJP küm asem ajungba benjungmong nung nashishi achiba benjung ka ayongzüka akaba aikati aitsüogo saka Bernard-i ashiba agi, iba ya parnok bejong amongdang benshiba sobaliba ka lir. Maneni iba maparen ya BJP pur ya Garo nunger anema asü masü ta jangjatsü asoshi inyakba liasü.
“Parnoki ozü lima nung nashishi nokdangtsü merang aser iba ajanga nisung aika temolung yirutsüogo,” ta leneir-isa ashi.
“Iba dak sendakba nung ola madokra iba ajanga tamangba yimsü balala amangba nüburtem tsüngda mangatettep adoker lila. Onoki tamangba yimsü ajak akhümtsübur, kechiba BJP pur onok yimya aser yimsü akhümtsübu masür? Onok lisopurtem aser BJP pur ya ainertem lir. Onoka onok ozüng lir aser parnoki ibaji akhumtsübut nung jungla. Hindu nungertem parnok temeden Garo Hills nungi kodanga magien. BJP puri lokti nung telemsa adokdaktsüba dak alaka kecha tajung meinyaker,” ta paisa ashi. Taoba BJP züngsemi maneni BJP pur nem vote magütsütsü asoshi lokti ajak dang kümdangshitsü atema metetdaktsü.
“BJP pur nungita meyari tsüngda, lokti ajaki Garo Hills nung asenok tang tashi lia aruba nung jangratemtsü ali mali ta asüngdangtsüla. Yimten yimsüsüba dak ajemdaker BJP pur nem tamangba yimsü kecha meprokshidaktsü tajungba asütsü,” ta Naraki maneni shisem.