BJP purtemi Mokokchung district sema jajar

Dimapur, July 13 (TYO) : BJP Mokokchung division nung lenirtem rongnung, Nagaland BJP tir Visasolie Lhoungu aser BJP Nagaland Organising secretary, Ananda Narayan Mishra nungeri anir Mkg district sema jajaba sentong nung July 8 nü Alongtaki assembly constituency kübok Chungtiayimsen council hall nung 30th Alongtaki Mandal BJP ketdangpurtemi anir unit shia nungi BJP lenirtem den senden ka menogo.
Iba senden nung State BJP tiri Chungtiayimsen BJP Youth kimen nung BJP nisan atsüketa yutsüogo. Iba sentong nung jembidang, Nagaland BJP tiri linük ajungalen taoba küm asem tsüngda Narendra Modi leniba nung terenlok mapa inyakbatem indang metetdaktsü. Paisa ashiba agi, BJP ya tamangba yimsü ka dak amangba telok ka masü saka Nagaland nung ochishia yimsü asüba government ta bener arutsü merangba yimten telok ka lir ta metetdaktsü.
Iba kasa sentong nungsa BJP Nagaland Organising secretary, Anandai jembidang, alima nung yimten telok tulutiba nung züngsem küma shilem agiba asoshi pelar aser tenüngsang agütsür ta sentepa alirtem dang metetdaktsü. Paisa BJP telok inyakyim indang shia liasü.
“BJP asoshi anogo shia ghonda ana agüjang aser ni iba melena Nagaland nung BJP government agütsütsü,” ta Anand-isa BJP nung inyakertem ajungshia metetdaktsü.
Iba sentong nungsa Mokokchung Division nung BJP tir Wb.L. Temsu Jamir, BJP Nagaland nung tatong tir & Mokokchung Division In-Charge, Er. Senkathung Jami, BJP Nagaland tatong tir Tsasepi Sangtam aser Co-Convenor (Finance) & S.E.M, BJP Nagaland, Temjen Imna Along nungertemi jembia liasü.
Iba sentong tenzüka India naklu ken aten aser BJP 30th Alongtaki Mandal nung Spokesman, Lanuakum menden liasü. Iba senden tenzüka I.Neken Imcheni sarasadem aser tarur ajak pelaa agizüka Mandal President, Monglu Jamiri jembi aser shilem agirtem ajak dang pelaba o BJYM 30th Alongtaki Mandal tir Alongti Longchari-i metetdaktsü.