BJP, RSS-i Delhi Police ji par sepaitem ama amshir: Kejriwal

New Delhi, February 01 (Agencies): Hombarnü Delhi Chief Minister, Arvind Kejriwal-i, linük tesem ajaklen kaketshirtem den raraba nung RSS aser BJP-i Delhi police ji par nija sepaitem ama amshir, ta aitsüogo.

Hyderabad University nung Dalit nunger kaketshir Rohith Vemula soseta asüba ken o dak sentakba nung January 30, 2016 nü RSS tongti office anasa tetsür densema lungkak aitertem dak police-i azükba atema Kejriwal-i aitsü.

“Delhi Police ji BJP/RSS anemertem amokmerenshtsü aser tekümdangtsü metetdaktsütsü asoshi BJP/RSS-i par nija sepaitem ama amshir. Kaketshirtem dak azükbaji ni kanga sashia aitsür,” ta AAP tongti lenir Kejriwal-i ashi.

Kejriwal-i twitter ajanga “FTII, Rohith ken o, Hyderabad University, IITs aser tang Delhi kaketshirtem dak taochi makai azük. Modi-i linük tesem ajaklen kaketshirtem anema rara ayongzüker ama reprangteter,” ta paisa ashi.

Kejriwal ya tang Bengaluru nung naturopathy treatment tagitak lir.

Police constable tem aser uniform magiba teburtemi kaketshirtem dak azükba video ka prokshiba sülen tanü nisung aikati Delhi police aitsüogo. Iba video clip ji social media sites nung merok mi ama prokshidagi.

Video clip tatsü ka nung police constable kati lungkak aiter tetsür ka dak kou nung ajepa amer atsüer aoba noksa lir, iba den külemi lanur ka dak mejungi azükba noksa alir.

Ano lungkak aitba osang bendentsü aser noksa tangoktsü atema aor osangbener ana dak-a police-i azük aser parnok meyong camera-a raksatsü, aser ibaji kanga tim masü, ta tenati shiogo.