BJP, RSS-i India ajungalen President’s Rule lidaktsünür : Arvind Kejriwal

New Delhi, March 27 (Agencies): Uttarakhand nung President’s rule alitsü ozüng agütsüba sülen Deobarnü Delhi Chief Minister, Arvind Kejriwal-i Modi’er sorkar sashia aitsüogo.
“Trust vote agitsü anogo ka jakdang President’s Rule alitsü ozüng agütsü? BJP-i democracy anema inyaker. BJP/RSS-i kijai yimsüsütsü meranger, parnoki President’s Rule ajanga linük madak yimsü süner” ta Kejriwal-i Twitter nung metetdaktsü.
Aam Aadmi Party lennir Ashutosh-ia Twitter ajanga Centre sorkari Uttarakhand nung PR alitsü telemtetba agiba aitsüogo.
“Uttarakhand nung kechi atalokogo, ibaji democracy tepsetba inyakyim ka lir. Assembly sabang nung sorkar ka nübo peria aliba mesüra malibaji sayutsüla” ta Ashutosh-i ashi.
“Modi’er sorkari opposition sorkartem melidaktsünür. Arunachal Pradesh sülen Uttarakhand sorkar atsüngdokbaji lendong aketba inyakyim ka lir” ta paisa shisem.
“Delhi assembly election matongdang Sher Singh-i AAP MLA ka alizüktsü merangba camera nung menüngok. BJP/Jaitley-i Delhi nung Sher Singh amadokogo ma?” ta Ashutosh-isa Twitter nung metetdaktsü.
Centre-i sorkar ketdangsübaren raksaba tenüng amer tanü Uttarakhand nung President’s rule alitsü ozüng agütsü. Congress nung mangatettep adokba sülen sorkar yimsüsüba nung khuret ka ajurur lia centre-i iba ashishitep aketba telemtetba agiogo.
Taküm January ita nunga Kejriwal-i Arunachal Pradesh nung Cabinet-i President’s Rule alitsü lemtetba atema aoksaba osang metetdaktsü. Iba inyakyimji Linük Temzüng tepsetba lir ta Kejriwal-i aija liasü.
“Union Cabinet-i Arunachal nung President’s Rule alitsü lemtetba atema kanga aoksar. Republic Day anogomung jakdang Linük Temzüng tepseter. BJP-i elections nung tamakok angu. Tang parnoki kishi tesülen nungi tashi angutsü meranger” ta Kejriwal-i Twitter nung lemsatep.