BJP, RSS-i linük temzüng melenshitsü meranger: Rahul Gandhi

New Delhi, August 17 (Agencies): Brihostibarnü Congress tatong Tir, Rahul Gandhi-i Narendra Modi’er sorkar aser RSS aija, parnoki linük temzüng melenshitsü meranger, anungji opposition party ajak longjemer ibaji anema raratsüla, ta ashi.
Tanü New Delhi nung Janata Dal-United lenir, Sharad Yadav-i ayongba “Save Composite Culture” senden nung jembidang Rahul-i, “Linük nüchiso anguba sülen (Jawaharlal) Nehru, (Sardar Vallabhbhai) Patel aser (B.R.) Ambedkar nunger ajaki nisung kati vote ka dang agütsütettsü atema jembi. Nisung kati vote ka dang agütsütetba inyakyim ali tashibo linükji parnok meyong masütsü ta parnoki meteta liasü,” ta metetdaktsü.
Gandhi-isa, iba ama tangatetba jagibo election nung takok mangutsü ta Rashtriya Swayamsewak Sangh (RSS)-i metet, ibayongji parnoki institution, media, universities ajak nung RSS nübotem anioktsü meranger, ta ashi.
“Asenoki parnok anema raratsüsa süra asenoki longjemer raratsüla,” ta Rahul-isa ashi.
Congress nung inyakertemi linük atema langa tajung inyaktsüner, saka BJP aser RSS-ibo linükji parnok meyong ama bilemer, ta pai ashi.
Gandhi-i ashiba agi, linük nüchiso atema raraba mapang nung RSS nungi tongti lenirtemi tepoukdak nungi adoktsü atema shidi ajanga British nunger dang tatok meshia mepishi.
“Parnok talenba nungi salatsü atema parnoki mepishi. Congress lenirtem mesüra tanga party tem nungi lenirtemi memepishi saka RSS-i dang British nunger dang tatok meshia mepishi,” ta Rahul-i ashi.
Paisa, “Bharatiya Janata Party (BJP) aser RSS-i tesülen nungi amaker. Parnoki kodanga tejaklen nungi mamaker, saka jena aotsü nungbo parnok tajungba lir,” ta aitsü.
Tawa Gujarat nung pa indang gari nung long agi aonba dak sendakba Gandhi-i, “BJP nung inyakertemi kü gari nung long agi aonba aser wako tanak sayuba mapang nung ni anener parnok den jembi. Ajisüaka ni gari nungi ayazüka aludang parnok ajen. Ibaji parnok yimya,” ta ashi.
Gandhi-isa, BJP-i küm shia mapa crore ana adokdaktsütsü ta nangzük aser kibong shia nem sen lakh 15 agütsütsü ta nangzük, saka nangzükba ama meinyaktet, ta aitsü.