BJP, RSS-i ni tepsettsü asalentong yanglur: Tej Pratap Yadav

Patna (Bihar), Luroi 24 (Agencies): Bihar kübok aliba Mahua tesem nung Rasemnü/Wednesday Muslim nunger Eid al-Adha benjungmung sentong agiba mapang Rashtriya Janata Dal (RJD) lennir, Tej Pratap Yadav-i semdanga liasü. Iba mapang hadir bener aliba nisung kati Tej teka nung ajepieta liasü.
Iba timtem atalokba sülen, toaba Bihar health minister, Tej-i ashiba agi, pa tepsettsü atema Bharatiya Janata Party (BJP) aser Rashtriya Swayamsevak Sangh (RSS) teloki asalentong yangluba lir.
“Ni Mahua tesemi aoba mapang hadir bener aliba nisung ka aruagi kü teben nung amet aser iba nisung yagi ni toktsür aotsü memulungi liasü. Iba asalentong ya ni tepsettsü atema RSS aser BJP nati asalentong yangluba lir,” ta Tej-i ashi.
Mahua nung Muslim nunger benjungmung semdangtsü atema tonga arua teloki Tej agizükba mapang iba nisungba ya telok rongnung densema aliba pa indang driver-i ajitet. Iba mapang Tej’er driver aser idakji densema alir teloki nisungbaji pua police nem agütsü. Ajisüaka, Tej-i ashiba agi, police-i iba nisung ya mapu.
Iba lendong atalokba sülen RJD lennir Tej Yadav-i state sorkar dang tasüngdangba ka ama, “ MLA aser minister tem iba ama tensa nungi tekümzüktsü mangu nung, kodasür nüburtem kümzüka yutettsü?”