BJP-Sena teloktep meraksatsüla: Gadkari

Mumbai, Monupii/May 29 (Agencies): BJP aser Shiv Sena na mangatettep kar alitsüa akok, ajisüaka party ana ya kati ka dak metaloker, ta shia Union minister, Nitin Gadkari-i party ana teloktep ya meraksai alitsüla, ta ashi.
Palghar Lok Sabha by election atema nüboyimba mapang BJP aser Shiv Sena na tsüngda bangsentepba dak sendakba nung Gadkari-i, saffron teloktep nung tangatetba balala mali; yimtenren nungbo teti tembar mesüra teti tsükchir asütsü ta mali, ta ashi.
“Iba teloktep ya asür Bal Thackeray (Sena tongti) aser asür Pramod Mahajan (BJP lnir) nati Hindutva onük nung ajemdaker yanglu aser party ana tangatetba balala mali. Iba teloktep ya maneni alitsüla,” ta Union Minister-i ashi.
Tesüiba küm pezü tsüngda Ato kilonser, Narendra Modi-i aniba sorkari inyaktetba mapatem osangbenertem senden nung metetdaktsüdang pai item o ya jembia liasü.
Sangküm Lok Sabha election aser Maharashtra assembly election agitsü lia party ana tsüngda tesendaktep atema nai inyaktsü asü? ta asüngdangba langzüdang Gadkari-i, pa Delhi nung ministry mapa nung kanga mazüngi lir, anungji Chief Minister, Devendra Fadnavis aser state BJP tongti, Raosaheb Danve nati iba mapaji inyaktettsü, ta ashi.
BJP-i nü nem iba mapaji nungloktsüra nai inyaktsü asü? ta asüngdangba langzüdang pai, “Atangji ni inyaktsü. Yimtenren nungbo kechi ataloktsüar memetet,” ta langzü.