BJP sorkar ya Muslim nunger anemer: Badruddin Ajmal

Hojai, August 2 (Agencies): New Delhi nung Modi ministry aser Assam nung Sonowal ministry naprongla Muslim anemertem lir, ta Assam nung Dhubri MP aser All India United Democratic Front (AIUDF) president Badruddin Ajmal-i ashi.
Hojai nung sentong ka nung jembidang Ajmal-i iba osang metetdaktsü.
“Iba sorkar yagi Parliament nung Muslim nunger anema bill aika benoktsü aser agizüktsü merangtsü. Onoki talaq menungiter, triple talaq ya onoki posema menungiter” ta Ajmal-i ashi.
“Kari aibelena triple talaq agütsüra, Quran nung telatetba kar lir. Ahadi-temi iba onük angatetteptsü meranger aser iba onük angadangtsü atema Muslim Personal Law lir” ta paisa ashi.
Muslim tsürtem atema tanga khuret aika lir. Pei taküm liyonga aotsüba, mapa inyaktsüba, shisaliok bushiba amala aika lir, saka iba sorkar yagi Muslim nunger reshikangtsü aser maaksütsü atema triple talaq bill nun gang temulung agütsür, ta Ajmal-i metetdaktsü.
“India nung Hindu tsür 68% shi ka balaogo saka Muslim tsürtem 26% shi ang bala. Süra kechiba Modi’er sorkari Hindu tsürtem indang khuret atema mebilemtsür?” ta paisa asüngdang.
“Modi’er sorkar kümtetba sülen parnoki Hindu aser Muslim nunger tsüngda putepa aser yimjung nung liyonga aruba raksatsütsü meranger. Telok ajak atema ozüng kasasa alitsüla” ta paisa ashi.
Ajmal-isa ashiba agi Centre sorkari Assam nunger temulung yirutsüogo.
Gujarat nung district ana nung tzümetsüng agi timtem ajurudang Modi’er sorkari sen crore 500 teyari agütsü saka Assam nung district 32 nung tzümetsüng timtem ajuruaka, iba tesadangji ang agütsü, ta paisa Centre sorkar aitsü.
“Election atema nüboyimba mapang dak alaka, timtem ajurudang Prime Minister aser central minister temi Assam semdangtsü mapang mali” ta paisa shisem.
“Ni Parliament nung 20 ben dak tema Assam tzümetsüng ya National Disaster ka ama sangdongang ta shiogo saka magizüker. Ajisüaka, ni iba ya matalok tashi ola adoktsü” ta Ajmal-isa shisem.
AIUDF president-isa Assam state sorkar aitsü.
Assam nung alirtemi küm 20 tejakdang nungi tzümetsüng timtem ajurua arur saka state sorkari iba khuret koktettsü atema mapa kecha meinyak, ta pai ashi.
Brahmaputra ayong ajanga tzümetsüng khuret bener arutsü koktettsü atema sorkari kecha meinyaker, ta Ajmal-i shisem.
Ajmal-i Assam kübok South-Salmara Mankachar district semdang aser Ajmal Foundation tenüng nung kibong 300 nem relief materials lema agüja liasü.
Dhubri district kübok nisung lakh 15 shi tzümetsüng agi timtemer. Nisung meyirjang aika relief camp 200 jungnüa nung jenoka lir.