BJP sorkari Assam nung ano ita trok ‘Disturbed Area’ sangdonger

Guwahati, September 01 (Agencies): Assam nung BJP-i aniba sorkari August 31, 2017 nü nungi tenzüka ano state nung ita trok ‘disturbed area’ sangdongogo.
Osang angazükba agi, Assam sorkari Armed Forces (Special Powers) Act, 1958 kübok aliba tashi nung ano ita trok Assam tesem ajakji disturbed area ta sangdonger.
Tang state nung tzüzüngozüng tensa apir, telungpur telok balalai rara kar adokdaktsüba nung ajemdaker disturbed area atsülangshir, ta kasa osang ajanga ashi.
Taoba ita Centre sorkari Armed Forces (Special Powers) Act (AFSPA) kübok Assam ajaklen ita ka atema disturbed area sangdonga liasü, aser tang mezüng state sorkari iba ozüng sangdongogo.
Ano Union Home Ministry-i Meghalaya nung Assam den arrtsülen, aser Arunachal Pradesh nung district asem August 3 nungi tenzüka ita ana AFSPA kübok “disturbed” sangdonga liasü,
Assam sorkari, army agientsü atema tensa ka masü aser state police peria mali, ta ashi.
1990 küm teleungpur tebilemtsü jenti aliba mapang nung Assam nung AFSPA benoka liasü.
Osangbener den jembidang Assam police tongti ketdangser kati, “Sangküm tashi nungbo AFSPA agientsü ta onoki imlar. Tangbo iba ozüng ya Assam nung magientsüla, kechiyong ken o jembitsü memulungba ULFA telok longjemshidar aser züngsem tasentem shimdar,” ta metetdaktsü.
Northeast nung Tripura state nung AFSPA agienogo aser Nagaland sorkaria state nung AFSPA agientsü takhangba agütsüogo. Tang Manipur nunga AFSPA lbenoka lir saka Mizoram nungbo AFSPA mali.