Guwahati, February 21 (Agencies) : Centre nung BJP sorkari “Emergency tasen” ka tenzüker aser iba ya taoba prime minister Indira Gandhi-i amshiba dang nungi tamajungba asütsü ta CPI(M) general secretary Sitaram Yechury-i metetdaktsü.
“Fascist tashitemi yimsü asür. Tanü sorkar nung Fascist tashitemi nübortemi ola adokba anema mapa inyaker. Parnoki India nungi Hindu Rashtra kümdaktsütsü atema tasa atonga lir aser ibaji anema noktaker ajak amaker. Iba ya Emergency tasenba lir” ta Yechury-i Guwahati nung sentong ka nung jembidang ashi.
“Linük anema noktaker ta aija parnoki nisungtem anema mapa inyaktsü. Hitler-ia Fascism teyari agia pa jenjang yanglu aser Fascism tembangdaktsütsü atema World War ka alitsüsa aküm. Iba nung tetsübutsü keta lir aser iba jagi Indira Gandhi-i ozüng agütsüba Emergency dang nungi tan ya tamajungba lir” ta Yechury-isa metetdaktsü.
Assam assembly elections atema CPI(M) nüboyimba sentong tenzüktsüdang, Yechury-isa, Modi’er sorkari shisaliok rejutem aser tentettem raksatsüba inyakyim anema mapa tulu ka inyaktsüla ta tayongzükba agütsü.
JNU tatalokba indang jembidang paisa, “Hindu Rashtra tentettsü atema parnoki ‘secular democratic republic’ samatsütsü meranger. Parnoki Hindu nunger tar nunger otsü aser Hindu theology tangatetba agi putiotsü melenshitsü meranger. Iba ya anema asenoki ajaki rara tulu rarar” ta ashi.
“Asenok nüjiso nüngdaker. Ayatzüra, lokti tsüngda tesempatep, kijatemi rongsenren amokbangba, Sangh tangatetba nunger ajak nungi asenok nüjiso nüngdaker. Iba amala nüjiso aginüa yimyim ayimbaji linük anema inyakba mapa ka masü saka linük meimba mapa ka lir. Nübortemi ola adokba nembangtsütsü atema parnoki linük meimba tenüng ameter tasa tasen atonga mapa inyaker” ta Yechury-isa metetdaktsü.
“Nathuram Godse ji RSS-BJP atema ‘national hero’ ka lir aser shirnoki Modi’er sorkar anema ola adokdir parnokji linük anemertem lir,” ta CPI(M) Rajya Sabha züngsemisa ashi.
Yechury-isa Assam nung Tarun Gogoi-i aniba sorkar aija jembidang, küm 15 tashi Congress-i Assam nung yimsü süa arudang loktiliba atema kecha meinyaktsü ta ashi.
“Anungji, Assam aser India nung alirtem ajak ajangzüktsü atema asenoki lenmang tanga ka bushitsüla. Iba asoshi Centre nung sorkar abenba teloki lenmang tanga kaji asütsü meranger, saka tesüiba küm ana tsüngda Centre nung parnoki inyakdang tenangzükba ka dang mapa küma meinyak lir. Takartem takarba akümer aser sensakertem sensakba akümer” ta paisa shisem.
“Linük nung kechisarena yangluba maparen ajemogo, mapa manguba khuret tuluka akümer aser Modi aruba sülen aluyimertem soseta asüba shilem 25 agi timba kümogo. Haryana nung Army jaokogo aser iba state nung BJP sorkar lir, Gujurat nung Patel temi lungkak aiter. Andhra Pradesh nunga mepetmesü adoka lir. Kechiba Modi’er yimsüsüba mapang item mepetmesü adoker?” ta CPI-M lennirisa ashi.
Yechury-isa Assam nunger dang Congress sorkar atsüngdoktsü aser BJP nem sorkar tashi marudaktsütsü atema mepishia metetdaktsü.
You must be logged in to post a comment Login