BJP sorkari Indo-Bangla arrtsü atsüdangtsü : Amit Shah

Guwahati, April 9 (Agencies) : Assam nung sorkar yimsü asütsü tashi anguba sülen BJP-i Indo-Bangla arrtsü ajunga atsüdangba dang masü saka Assam nung Bangladeshi khuret khenyongi malitsü, ta BJP national president, Amit Shah-i Honibarnü metetdaktsü.
“Centre nung BJP sorkari Bangladesh den arrtsü khuret koktetogo aser onoki kobi melii arrtsü atsüdangtsü” ta Guwahati nung Amit Shah-i ashi.
Bangladesh den tenangzüktep kecha maliba agi taoba Prime Minister, Atal Bihari Vajpayee-i Bangladesh nunger ozüng alema aruba khuret mokoktet, ta paisa shisem.
“Iba mapang asenoki Bangladesh den tenangzüktep (Land Boundary Agreement) kecha maliasü. Iba jagi arrtsü atsüdangba tembanga meinyaktet. Tangbo tenangzüktep agiogo” ta Shah-i osangbener senden ka nung ashi.
Centre nung Vajpayee lenisüba kübok BJP sorkar aser Assam nung Prafulla Kumar Mahanta’er AGP sorkari na külemi iba khuret mokoktet ta asüngdangdang BJP Tir-i iba telangzüba agütsü.
“Ozüng alema aruba khuret koktettsü atema Centre aser State nung BJP sorkartem alitsüla. Assam sorkar kijai iba ya mokoktettsü. Taoba mapang AGP ji BJP den teyariteper telok ka liasü” ta Shah-isa metetdaktsü.
“Onok tashi anguba sülen arrtsü kanga junga atsübangtsü aser NRC updation mapa tekaratiba nung inyaktsü. Assam, India aser Bangladesh sorkartem tsüngda tenangzüktep agia ozüng alema arurtem belenba mapa inyaktsü. Ibaji Assam sorkar kijai dangbo meinyaktettsü” ta paisa shisem.
“BJP-i aniba teloktepi Assam nung sorkar kümtetra, ita asem tashi nung sorkari arrtsü adena aitba maparen noktangtsü atema sorkari inyakyim ka tenzüktsü. Bangladeshi nunger khuret ajanga küm aika Assam nunger lanurtem timtem jenti ajurua arur. Iba khuret ya linük atemaa security tebilemtsü khuret ka lir” ta BJP tirisa metetdaktsü.
“Onok taginübaji Assam nung sorkar tentettsüba dang masü, saka lokti ajak aser tesem ajaklen renlokdaktsütsü atema lir. Prime Minister Narendra Modi-i India renlokdaktsütsü atema mapa inyakba nung iba election ya apu ka alaba amai lir” ta Shah-isa ashi.
BJP-AGP-BPF teloktep ya Assam nunger yongsük ajak tenüng nung lir, anungji iba teloktepi asemsü nungi anasü nung takok angutsü atema nübortemi vote agütsütsü mepishir, ta paisa shisem.