BJP sorkari Naga yimten latettsü songtemer: Imkong L Imchen

Dimapur, Rongchii (April) 10 (TYO): Naga yimten olemtep kanga junga agia aruya liasü saka Centre nung BJP-i aginüba ama iba maparen songtema yuogo ta taoba Health & Family Welfare, Election Minister, Imkong L Imchen-i tanü ashi.
Naga yimten tebilemtsü songtema ayutsü atema Centre nung BJP sorkari Nagaland nung BJP-i aniba sorkar ka kümdaktsütsü merang. Iba jagi tang Naga yimten tebilemtsü atema mapa anendaka yua lir, ta Imkong-i osangbenertem dang ashi.
Nagaland nung alirtemi telok shinga nema sorkar akümtsüsa tashi magütsü aser iba jagi BJP-i aniba sorkar ka tsüremseta aküm. Tanü political party ajak aser NGO temi tashi mait sorkar tasen dak ranglokba dak alaka ola madoki lir, ta paisa shisem.
India sorkar atema interlocutor RN Ravi-i kanga dang meranga Naga telok aika den ajurutepogo saka pa India sorkar ket nung lir, anungji bilemba ama mapa meinyaktettsüsa talenbangbatem lir, ta Imkong-isa ashi.
Nagaland Legislative Assembly indang election dang nungibo Naga yimten tebilemtsü ya tulutiba. NLA election yabo teti inyaka aruba mapa ka dang saka Naga yimten latettsü atema telemtetba ka agitsübaji tongtipangtiba lir.
13 buba NLA indang election magidang tamasa Naga yimten latettsü atema takhangba agütsüdang nisung aikati assembly election nung tajangzük angutsü atema liasü ta bilem saka ibaji tiyazü lir. Tarutsü nung Naga nungertemi 12 buba NLA züngsemtem aser NGO balalai iba onük atema noktakba pelaa agizüktsü, ta paisa ashi.
Naga nungertemi maneni yimten tebilemtsü atema mapa inyaktsüla aser Naga nungertemi aginüba ama tekaratiba nung Naga yimten latettsü atema merangtsüla, ta Imkong-i ayongzük.