BJP sorkari Nagaland terenlok lenmangi anitsü: Mishra

Kohima, May 31 (TYO): 2018 State General Election agiba sülen BJP-i sorkar aküm nungang Nagaland nung lenla ajaklen terenlok kanga kera alitsü, ta tanü National BJP Secretary (Organisation) I/c Nagaland, Ananta Narayan Mishra-i metetdaktsü.
Tanü CK Arcade, Kohima nung BJP Kohima District executive senden nung jembidang Mishra-i, Delhi nung BJP sorkar lir asünungji, Nagaland nung BJP-i sorkar akumba ajanga state nung terenlok alitsü, ta ashi.
Paisa, yimsüsütsü maongka agütsüra taruba küm pongu nung BJP-i India nung tanga tesentem den liromedema lenla ajak nung terenlok katsüba ajanga Nagaland ya kotak lima mesüka melenshitsütsü, ta metetdaktsü.
BJP sorkar aliba tesem ajak nung terenlok mapatem kanga kera alir, ta shia Mishra-i, “BJP-i state nung sorkar kümra onoki state nung tongti district headquarters ajak Railway line den sendakteptsütsü, AIIMS aser Cancer Institute amenoktsütsü,” ta metetdaktsü.
Paisa, taruba state election matongdang tang teinyakdak, Dimapur-Kohima National Highway four lane ya tuluba ka temer alitsü, ta ashi.
Paisa BJP party nung inyaker tetsür-tebur ajak dang state nung pary sorkar tashii arutsü atema meranga inyaktsüla, ta ajungshi.
Tetemsü candidate tem dang lira BJP-i menden ajak nungi toktepdaktsütsü, ta shia pai party lenirtem dang candidate tenüngtem benoktsü mepishiba den külemi state nung BJP tashii arutsü atema inyaktsü ajungshi.
Ano külen BJP National Secretary (Organisation)-i, BJP ya tamangba lokti party ka masü, saka BJP ya nüburtem tenzüktsü atema tentetba party ka lir, ta metetdaktsü.
Mishra-isa BJP indang mapatongtem aser sentongtem indang metetdaktsü. Iba nungji full-time workers, Great Membership drive, Mass Contact, social media ajanga inyakba, BJP Yuva Morcha-i Blood Donation camps ayongtsü aliba aser Mahila Morcha-i Swaach Bharat Abhiyan inyaktsü aliba densema lir.
BJP Nagaland Tir, Visasolie Lhoungu-ia, BJP ya nüburtem indang party ka lir, aser sensakertem atema inyaktsü jangraba ajanga BJP sorkar len anidaktsür, ta metetdaktsü.
Naga nungertemi BJP tangatetbatemji Hindu yimsü nung ajemdaka lir ta tsübur, ta shia pai, Naga nungertemji India Temzüng Arrla 371(A) kübok kümzüka lir, koba ajanga state assembly nem legislative tashi balaka agütsür, ta ashi.
Tamangba yimsü nung ajemdaker bendangshidanga amshir ta aitsüba dak sendakba nung Lhoungu-i, BJP sorkar kübok tamangba yimsü nung ajemdaker shinga anema meinyak, ta ashi.
“Linük temzüng kübok ozüngtem nung, nisung ajaki kin mesüra tamangba yimsü mashie benshitsü akok,” ta paisa ashi.
“Item ama yazü tongloktsübatemji asenoki mamangtsüla, ajisüaka BJP ji terenlok, temelenshi aser sensakertem ajungkettsütsü atema lir ta asenoki metettsüla,” ta pai ashi.
BJP-i ochimashi tapu ajak anema nokdaker, ta shia pai, BJP-i ochimashi maliba sorkar ka agütsütsü aser state terenlok lenmangi anitsü, ta shisem.
Lhoungu-isa, August 27, 2017 nü BJP National Tir, Amit Shah-i Kohima semdanga lokti senden ka nung jembitsü, ta metetdaktsü.
Tanü amenba senden nung Yuva, Mahila, Kisan, Minority Cell, ST densema district nung Morcha balala aser Mandals teneti osangtem agüja liasü.