BJP state tir asütsü Imna Along shimogo

Dimapur, Aenjeti/January 14 (TYO): Tanü Hotel Saramati, Dimapur nung BJP Nagaland state Organisation election agiba mapang 2020-2023 tenure atema Minister of Higher & Technical Education and Tribal Affairs, Temjen Imna Along Longkumer, züngsem ajaki mulunga Bharatiya Janata Party (BJP) state tir asütsü shimogo.
Election inyakyim ya national general secretary Sushri Saroj Pandey aser Bihar nungi MLA Nitin Nabin matsüngdang agia liasü.
Tir tasenba Temjen-i, Centre nung party lenirtem aser state nung party kübok inyaker ajak dang pa dak tamang katetba atema pelaba lemsatepba den Naga nunger tem ajungkettsü asoshi aser Centre nung BJP aser Naga BJP tsüngda tesendaktep tajungba asoshi meranaga inyaktsü nangzük.
“Asenok ya tribal state ka lir, kong Khristan tem timba lir aser BJP party ya-a tanga party ama secular party ka lir aser nationalism metsünga reta benoktsü aser linük ajunga ajungkettsü asoshi rangloker inyaker.
“Aiben asenoki asenok tebilemba linük nung tanga tesemtem den melemsateptetter aser tangari Naga nunger tem dang parnok tebilemba melemsatepteter,” ta pai ashi. Paisa, party-i apular ka ama maneni inyaktsü aser terenlok maparen balala ajanga sentoka aliba telok ajungkettsü, ta ashi.
NLA Speaker Vikho-o Yhoshü aser MLA T Torechu asüba sülen taruba bye elections nung BJP pur shilem agitsü magitsü, ta asüngdangba mapang pai, BJP ya PDA kübok party ka lir aser PDA alliance kümtetba tamendakdak dak ajemdaker onoki inyaksangshitsü aser tanga party tem den sendakteper inyaktsü, ta ashi.
Minister for of Transport, Civil Aviation, Railways and Land Resources, P. Paiwang Konyak, national council nung state party tenüng nung oa shilem agitsü asoshi shima liasü.