BJP State unit-i DAN sorkar anema ken o agütsü

Dimapur, November, 10 (TYO): BJP State unit-i Nagaland Angh, P.B Acharya dang temepishiba shidi ka ajanga DAN sorkari tim mesüi yimsüsüba indang metetdaktsüogo, ta BJP Nagaland otongdar, M.Yanghose Sangtam-i tanü sangdong ka ajanga metetdaktsü.
State nung aliba nüburtem tebang agi meshiteti timtemdang party-i ola madoki meliteter, ta sangdong nungsa shia lir.
DAN sorkari ochimashi jenti inyakogo, aser iba atema tang rongdak mera kar magira asen lokti jenjang kanga atsüngzüka alutsü, kong tzüzüng ozüng malitsü, terenlok, mangdang mesüra nükjidong malitsü, ta parnokisa metetdaktsü.
Iba atema kuli agüja BJP State Unit-i, C & AG reports ajanga tang aliba sorkar kübok state nung ochimashi jenti aliba sayur, Rural Development, School Education, Medical, Social welfare, Power, Food & Civil Supply ama department aika den sector aika nung ochimashi jenti angur, koba ajanga stakeholders-i longkak balala aiter, ajisüaka yazü tenangzükba agi tebang nembangtsür, aser ibaji tawa SSA tesayurtem longkak aitdanga atalokogo, ta metetdaktsü.
Kasa sangdong ajanga parnoki, state nung Vigilance Commission tashi makai kümogo, aser ibaji tawa State Cabinet-i, bushisüngdangtsü atema Chief Secretary dang nungi tama temelaba meshitsüla ta bangzüng renemba ajanga lir, aser ibaji ochishia bushisüngdangba nokdangtsü tebilemba nung inyakba lir, ta ashi.
Ato kilonser, Narendra Modi-i yimsüsüba nung ochimashi malitsü atema ayongzükba den sentaktepa party-i ochimashi anema nokdaktsü aser inyaktsü, ta sangdong nungsa shia lir.
State BJP unit Nagaland-i Nagaland Angh dang iba atema tiyongtsüi aita inyakdaktsüner aser state nüburtem atema tim mera agidaktsüner ta mepishiogo.
BJP State Unit nungi state Angh ajurutemji Tir, Visasolie Longue, (Rtd) Finance & Development Convener, HK. Khulu IAS, BJP Advisor, IK. Sema. taoba Tir, Dr. M.Chuba Ao aser SEM Dr. Temsuwati Ao nunger liasü.