BJP takok mengudaktsütsü atema Congress nem maongka agütsü

Guwahati, March 26 (Agencies): Congress aser All India United Democratic Front (AIUDF) tsüngda tesentaktep lir ta jembiba mapang ka AIUDF nungi Dhing MLA-i ashiba agi Bharatiya Janata Party (BJP) nem vote mengudaktsütsü atema parnoki Congress nem maongka agütsü.
“Onoki BJP nem takok mengudaktsütsü atema parnok nem maongka agütsüogo. Congress-i Dhubri aser Barpeta parliamentary constituency tem nung candidate shimra, onoki parnokji BJP indang agent tem ta ashitsü” ta MLA Aminul Islam-i metetdaktsü.
AIUDF-i menden asem atema candidate shimba osang metetdaktsüogo.
Party tanishir aser tang teinyakdak MP Maulana Badruddin Ajmal-i maneni Karimganj nungi tokteptsü.
Barpeta menden atema AIUDF-i MP Sirajudin Ajmal melena Hafiz Rafiqul Islam nem ticket agütsüogo.
“Dhubri aser Barpeta nung Congress-i toktepra Asom Gana Parishad (AGP)-i Kaliabor menden nunga takok angutsü” ta Islam-i ashi.
“2014 küm Congress-i takok anguba mesüra AIUDF dang nungi votes teimba anguba mendentem nung onoki metokteptsü. Congress-i maneni aibelenra tang-a BJP-i takok angutsü” ta paisa shisem.
Muslim nunger teimba ser aliba Dhubri, Karimganj aser Barpeta LS menden asem nung 2014 küm AIUDF-i takok angu.