BJP Tir Amit Shah-i NDA nung adentsü Bihar CM Nitish jaoker

New Delhi, August 12 (Agencies): Honibarnü Bharatiya Janata Party (BJP) Tir, Amit Shah-i, pai Bihar Chief Minister, Nitish Kumar dang National Democratic Alliance (NDA) nung adentsü jaokogo, ta metetdaktsü.
Taoba ita Nitish Kumar-i Bihar Chief Minister menden nungi anenba den külemi teloktep nungi pila, iba sülen BJP den lokteper ano sorkar tasen küma liasü.
Honibar anepdang twitter ajanga Amit Shah-i, Hokolbarnü senden amendang pai Nitish dang BJP-i aniba NDA teloktep nung adentsü asüngdang, ta metetdaktsü.
Shah-isa twitter nung tena senden amenba noksa ka lemsatepa liasü, aser iba noksa nungji pai yamai zülua lir, “Bihar Chief Minister @NitishKumar ajuruogo.”
Yashi iba senden amenba sülen Bihar Chief Minister-isa Ato kilonser, Narendra Modi-a ajurua liasü.
BJP-i mapang talangka rongshia aruba sülen taoba ita Nitish Kumar-i state Deputy Chief Minister, Tejashwi Yadav Cabinet nungi anentsü, iba sülen pai JD-U, RJD aser Congress-i akumba teloktep ‘mahagadhbandhan’ nungi pila.
Iba tatalokba sülen CBI-i RJD tongti, Lalu Yadav, pa kinüngtsü Rabri Devi aser par jabaso, Tejashwi Yadav nunger anema ochimashi inyakba ken o benoka liasü.
Ajisüaka tasüngnüjisa Nitish Kumar Bihar Chief Minister atema tenangzükba agi aser Deputy Chief Minister Sushil Modi shima kasa anogo nungsa tenangzükba agi.
Item tatalokba dak sendakba nung Nitish Kumar-i, “State terenlok atema ni iba teloktep toktsü,” ta metetdaktsü.