BJP Tir Amit Shah’er kidang ‘Sarbjit’ film poster saya

March 01, 2016 : Hombarnü BJP Tir Amit Shah aser Union Minister of Road, Transport & Highways, Nitin Gadkari nati Omung Kumar-i yangluba ‘Sarbjit’ film indang poster mezüngbuba BJP Tir’er kidang sayatsüogo. Iba film ya Sarbjit Singh taküm otsü dak ajemdaker yangluba lir. Iba poster sayaba sentong nung actresses Aishwarya Rai Bachchan aser Richa Chadha na den actor Darshan Kumar aser movie producer tem Bhushan Kumar, Vashu Bhagnani aser Sandeep Singh nungera dena liasü.
“Iba otsü yanglutem nem ni tenüngsang agütsür. Iba ya lanur kati linük asoshi pa taküm tenlaba indang otsü lir. Iba film dak sentakba nisung ajak dang kanga pelar aser iba film takok angutsü kü teimla. Iba film otsü ajanga linük tesem ajak atongtsü ni imlar. Dalbir Kaur aser Sarabjit Singh na oktongba otsü ajanga nüburtem kanga ajungmesotsü,” ta Shah-i ashi.
“Ibai otsü ya linük nüburtem asoshi kanga tongtibang. Iba film ajanga teyi o teno na linük asoshi timtemba sayur. Iba otsü ajanga linük lanurtem tali ajungmesotsü,” ta Gadkari-i ashi.
Sarabjit Singh ya India nunger aluyimer ka liasü, ajisüaka pai Pakistan nung itangiter mapa inyaker aser kiralongrar mapa nung shilem agir ta tai tongloktsür alenseta südaktsü.
Lahore nung April 2013 küm pa tepuokdak alidang külemi tepuokdang alirtemi kanga mejungi asükba sülen anogo ishika lir asü. Iba film ya Sarabjit aianu Dalbir Kaur-i ashiba dak ajemdakr yanglua lir.
Iba film nung Aishwarya Rai Bachchan-i Dalbir Kaur ama shilem agitsü aser lai, “Film nung ni Dalbir Kaur ama shilem agitsüba ya kanga akhümketa bilemer,” ta ashi.
Actor Randeep Hooda-i Sarabjit Singh ama aser Richa-i Sarabjit kinüngtsü ama shilem agitsü.
Nüburtemi meteta alitsü atema onoki iba shitakba atalokba otsü nung ajemdaker iba film ya yanglu, ta Omung Kumar-i ashi.

You must be logged in to post a comment Login